BEDAU DIADU: Kaki lima sekula nya runtuh tang nyentuk ke sehari tu apin digaga baru.
Nembiak tinduk besekut ba rumah kepala pengajar, kaki lima buding sekula runtuh bedau diadu baru
SIBU: Penusah kaki lima buding sekula SK Punan Ba di Belaga runtuh urung pukul 8.50 malam kena 31 Januari pun taun tu tadi ngenataika mayuh pekara bukai nyadi.
Nitihku penerang, ketegal penusah tu mega lima iku nembiak sekula nya patah lengan, tiga iku pechah tulang kaki enggau seiku pechah tulang belakang.
Semua sida diperubat ngagai Sepital Kapit.
“Bepun ari nya mega, piak sekula nadai chara bukai kelimpah ari nejuka bala nembiak tinduk ba rumah kepala pengajar.”
Tang ketegal kelalu sekut pekara tu tau ngeruga pengelikun nembiak.
Nambahka nya, penyauh rumah kepala pengajar ari kelas ngujungka bala nembiak berasai lelak bejalai kaki ninting hari kelimpah ari suah memusu maya hari ujan.
“Penusah tu mega nejuka nembiak enda lantang belajar,” ku iya.
Kaban Parlimen Hulu Rajang Datuk Billy Abit Joo ti bisi beratika penusah nya nyuaka cek beungkus RM10,000 ngagai sekula.
Iya besemaya deka minta bantu ari Opis Menteri Pelajar ngaga buding baru.
Projek ngaga baru buding tu dipadahka tembu tengan taun tu tang nyentuk ke sehari tu, perambu nya apin dipenyadika ngujungka raban sekula enda lantang ati.
Penusah tu dipadahka bisi ngaul pemutus Ujian Penilaian Sekolah Rendah (UPSR) ti mandangka nurun ari 83.33 persin dalam kandang tiga taun ngagai 47.62 persin.
Ba taun 2010 sekula tu bulih pemutus 81.33 persin niki ngagai 84.44 persin ba taun 2011 lalu taun tu nurun ngagai 47.62 persin.
Berindik ari nya, raban sekula enggau bala bukai balat andal penusah nya ulih diputarka enggau lengkas sebedau sekula baru berengkah taun deka datai.