BETONG: Jamatan Batang Layar ke benung digaga diatu kelai pemanah perintah nyendiaka perengkaguna ke pemadu manah ngagai rayat.
Sapit Injineer Opis Kereja Raya (JKR) Betong Franklin Bantin madahka, jematan nya deka nyadika penyambung ngagai empat buah rumah panjai iya nya Rumah Batu Lintang, Rumah Mupoh Atas, Rumah Mupoh Baroh enggau Rumah Kabok enti udah tembu ila.
“Jematan tu ila deka nyambung ngagai Jalai Nanga Buai, Merinjau enggau Ulu Spak, Betong sereta terus nuju ngagai empat buah rumah panjai nya.
“Enti jematan tu udah tembu ila, urung 1,000 iku mensia mayuh ba Layar Tengah lantang sereta muntang mindah kin kitu,” ku iya.
Kelimpah ari nya, sida mega nyamai agi bejualka asil tanam sida.
“Jematan tu ulih ngelancharka pejalai mensia mayuh ba kandang menua nya nurun ke pasar sereta bejual asil tanam enggau lengkas, ti deka nyungkak penatai pemisi sida.
“Sida mega ulih ngurangka ungkus perengka pengangkut lebuh ti nurun sereta pulai ari pasar,” ku iya seraya madahka jematan nya disadang tembu taun baru.
Maya ke nganti projek tu tembu digaga, ku iya, perintah deka ngaga sebuah jematan sentara ngambika bisi ditengah mensia mayuh ba kandang menua nya.
“Jematan sentara nya deka digaga begembar enggau palan endur ngaga jematan baru nya, ke mega nyadika jalai mensia mayuh ba kandang menua nya pulai mansang ngagai kebun,” ku Franklin.