Tuesday, November 30

MRC nyaup ngemenatka pemedis pesakit di Hospital Serian

0

SERIAN: Gerempung Anak Bulan Mirah (MRC) Chapter Serian enggau MRC SMK Serian udah bisi ngatur servis karoling di Hospital Serian bedau lama ke udah beserimbai enggau hari Krismas sereta pengerami Taun Baru.

Raban sida nya betubuh 40 iku ari SMK Serian, betuaika Pemesai MRC Phang Nyuk Lan, Alexan­der Mandi, Cherilyn Vong enggau Patrick Mawong.

Sida bisi ngelawa Wad Bebadi Ngenyit, Wad Fisioterapi, Wad lelaki, Wad Nembiak, Wad Be­ranak, Pusat Haemodi­alysis, Begian Pesakit Pulai Hari enggau begian Pesakit Kemi Manis & Darah Tinggi.

Rambau nya, sida udah meri 84 bengkah pemeri Krismas ngagai orang sakit, 150 ngagai pesakit pulai hari sereta 50 beng­kah pemeri Pesakit Kemi Manis & Darah Tinggi.

Semua pemeri nya dipelanja Gerempung Anak Bulan Mirah Chap­ter Serian.

Pemangku Direktor Hospital, Dr. Saravanan beterima kasih ngagai MRC ke udah ngelawa pe­sakit nengah chara karoling sereta mai pengaga seraya ngemenatka penyakit.

Menijer Projek Phang Nyuk Lan ke mega nguasa Unit Nembiak Chapter Serian & Pengajar Nge­mata Unit Nembiak SMK Serian madahka aktiviti nya sebengkah ari aktiviti ke diatur ninting taun ung­kup raban nembiak enggau volunter.