Pengerami mantar Krismas nerima sukung ari menteri

0

PUJI TUHAN: Raban koir Krismas merindang mensia mayuh enggau lagu puji ari panggau di Pasar Batu 10 kena malam Hari Enam tu tadi.

KUCHING: Opis Menteri Pemansang Rama (KPS) nyukung penuh pengawa ngatur program dikena nyambut pengerami mantar Krismas ke digulu mayuh bengkah serakup enggau gerempung ngambika bisi dikena ngerapit kaul entara pupu raban bansa ke megai macham bengkah jalai pengarap di nengeri tu.

Menteri iya Tan Sri William Mawan Ikom madah, program ti baka tu meri besai reti ngagai semua piak enda ngira pegai jalai pengarap ngambika sama-sama ngasaika pengerami nyambut Krismas.

Iya bejaku munyi tu nengah pesan jaku pandak (SMS) ke dikenataika Sekretari Politik Kepala Menteri Paul Igai ba program Nyambut Hari Krismas 2012 diatur SABERKAS Nengeri di Supermakit Giant, Batu 10 ditu malam Hari Enam tu tadi.

Bela bisi datai ba pengawa nya Sekretari Besai SABERKAS Datuk Aidan Wing, Chairman Komiti Rama SABERKAS Nengeri Watson Bangau enggau Chairman Kunsil Kandang Menua Padawan Lo Khere Chiang.

Program  Krismas nya berengkah pukul 3 lemai nengah pemandang auto (BMW) enggau skateboard, ditangkan pemerindang muzik live ari KPS sebedau gimik Krismas urung pukul 8 malam ulih temuai dipebasa.

Batang program ba pengerami tu nya karoling  ke dipasuk  raban koir ari empat chabang gerija sekeda nya, Sunny Hill SDA, Gereja Katholik Sacret Heart Kampung Semeba, Gereja anglika St Thomas enggau Gereja SDA  Batu Kawa.

Dikena ngerichaka agi pengerami nya bisi mega diatur pemerindang tanda Oppa Gangnam Style, pemerindang muka tire ulih Rudolf the Reindeer, Ready Go enggau Oppa Santa Style.

Temuai ke benasit maya nya pulai mai perais ke dipelanja Giant sereta perais besai iya nya bemalam enda bebayar di Hotel Hilton.

Sebedau program nya tembu, semua orang ke bisi datai sama-sama enggau belagu ‘We Wish You A Merry Christmas’ bebala -mayuh.