Pengari Mas Gading, mungkur Opar enggau Tasik Biru udah nyikap diri dikena napi PRU13 tu ila
KUCHING: Chalun ke dipelaba deka ngarika Barisan Nasional (BN) ba sitak Mas Gading maya pengawa bepilih besai ti ke-13 (PRU13) tu ila, Anthony Nogeh Gumbek madah, raban iya udah nyikap diri napi barang sapa maya nya.
Naka ke diatu, sida udah bebendar ngaul kedut sereta sukung ari mensia mayuh ngambika Mas Gading ulih ditan maya PRU13 ke dipelaba deka diatur ba suku keterubah taun 2013.
Penyukung BN Opar enggau Tasik Biru udah ngenegapka penuduk nengah kos ke diatur empai lama ke udah iya nya 17 November ba Kem Bina Negara Sempadi Lundu sereta di Kampung Tebaru Lundu kena 16 Disember tu tadi.
Kos enggau aum tu diatur raban pemesai BN ari perintah besai sereta dipelanja opis JASA, ku iya lebuh dikerandau.
“Kami udah nyikap diri dikena napi PRU tu. Semua atur ngenegapka diri udah magang dikereja ba Mas Gading,ku iya.
Kelimpah ari nya, Nogeh mega bisi nyenguk sereta ngulu pengawa beripai ba Kampung Skiat, Bau kena 15 Disember tu tadi seraya ngedutka kaul enggau peranak menua ba sitak nya.
Beserimbai enggau pengerami mantar Krismas, Nogeh mega deka ngulu pengawa beserumpu makai lemai di Kampung Musi Bau begulai enggau raban bansa China ari sitak Mas Gading.
Nogeh udah dikearap ngarika Parti Demokratik Progresif Sarawak (SPDP) ba sitak Mas Gading ke ngelama tu endang kubu BN.
Berebak enggau nya, kaban parlimen Datuk Tiki Lafe ke nadai beparti pengudah dibuai ari parti nya bepun ari penemu ke enda senutuk enggau presiden, ngarapka diri dikemendar ngetanka penuduk dia.
Lebuh dikerandau, chairman SPDP Tasik Biru Michael Siten madah, pengerami endur 10 raban pemuzik deka besemekih ngerebut gelar bisi diatur ba Kelab Sukan enggau Rekreasi Singai in Kampung Sudoh, Singai Bau kena 21 Disember tu.
“Presiden SPDP Tan Sri William Mawan Ikom deka nyadi temuai ti dipebasa maya nya. Nogeh sereta kaban kunsil tinggi SPDP mega deka ngulu pengawa nya” ku Michael.
Mas Gading mungkur sitak kunsil nengeri Opar enggau Tasik Biru. Opar dipegai Parti Sa’ati Rayat Sarawak (SUPP) lalu Tasik Biru diempu SPDP.