Taja mayuh penimpang, KPKS nadai penanggul ngemanah pengawa, ku Lo

0

ENDA CHUKUP: Dr. Nurul (kiba) nyempulang Lo (kanan) nunjukka 14 endur orang mayuh ngengkah kerita di luar pagar klinik nya. — Gambar Muhammad Rais Sanusi

KUCHING: Klinik Pengerai Kota Sentosa di Batu Tujuh tetap meri servis engkeman ngagai orang mayuh ke datai berubat taja pan betapi enggau pengurang tauka pengelemi sepemanjai 10 taun lebih ke udah.

Chairman Kunsil Kandang Menua Padawan (MPP), Lo Khere Chiang madah, pengurang servis ba Klinik Pengerai Kota Sentosa (KPKS) nyengkaum enda chukup palan ngengkah kerita, lutur enggau indu misi.

Lo ngarapka opis menteri ti bekaul ulih beratika pekara nya, ke tuju pengelantang mensia mayuh ke datai berubat ngagai klinik pengerai nya enggau orang ke ngelilingi endur nya (Batu 7).

Iya madahka penanggul enda chukup endur ngengkahka kerita ba klinik nya patut diputar ngambika ulih meri pengelantang ngagai orang mayuh ti berubat kia.

“Kitai ngarap sereta minta bendar Opis Pengerai Bagi Menua enggau Opis Menteri Pengerai mutarka penanggul ke nuntung orang mayuh ke berubat ngagai Klinik Pengerai Kota Sentosa, Batu Tujuh lebih agi bekaul enggau enda chukup endur ngengkah kerita, sekalika nyendiaka palan pengengkah kerita betingkat.

“Kitai bebendar minta pekara tu dikemerat laban penyampau tubuh mensia di Kota Sentosa (Batu 7) nambah lima persin tiap taun. Klinik tu ukai semina begunaka endur ngengkah kerita ti chukup tang nyengkaum lutur enggau indu misi,” ku iya.

Iya mansutka pekara nya lebuh ti meresa penanggul bekaul enggau enda chukup endur ngengkah kerita ba Klinik Pengerai Kota Sentosa ditu, pagi kemari.

Lo madah, iya bisi nerima sebana ari orang mayuh ke datai berubat sereta ke diau ba Batu 7 bekaul enggau penanggul nya.

Iya madahka MPP besedia ngaga enggau ngiga palan endur ngengkahka kerita enti nyema diberi peluang.

Ngenang pekara ke sama, Pegawai Perubatan Menguasa Klinik Pengerai Kota Sentosa, Dr Nurul Azlin Mohd Noh madahka, penanggul enda chukup endur ngengkah kerita suah dikenataika ngagai opis menteri ke bekaul.

Nitihka penerang iya, kandang Klinik Pengerai Kota Sentosa semina ke dalam pagar klinik nyengkaum kurang ari 20 endur ngengkahkka kerita (dalam pagar).

“Taip taun kami nengah Opis Pengerai Bagi Menua ngenataika penanggul enggau peminta nambahka endur ngangkahka kerita ngagai opis menteri. Kami semina bisi dua endur ngekahka kerita beperabung enggau 10 endur ngengkahkka kerita nadai perabung nyengkaum Ambulan.

“Kandang Klinik semina ke dalam pagar tu aja, enti kami deka ngaga sebarang pekara di luar pagar kami petaut beradau dulu enggau Hospital Sentosa,” ku iya.

Klinik Pengerai Kota Sentosa, Batu Tujuh ditumbuhka dalam taun 2001 ti berengkah nyendiaka servis perubat luar (Jabatan Pesakit Luar) enggau klinik pengerai indai enggau anak, ke diatu mega bisi klinik perubat ngeli.

Kelimpah ti nerima orang ke sakit berubat ba klinik nya, klinik nya mega nerima orang sakit enggau berubat ari tiga klinik desa kebukai.

“Kami mega nerima sida ke berubat ba Klinik Pengerai Indai enggau Anak Tiang Bukap, Bengoh enggau Batu 10, nyemaka sida diasuh betemu enggau lutur, laban ba klinik desa nya nadai lutur.

“Dalam kandang sehari kami nerima 450 iku orang berubat ke nyengkaum pesakit luar enggau ke beperesa ngagai Klinik Pengerai Indai enggau Anak Kota Sentosa aja enda nyerangkung klinik perubat ngeli. Taja pia kami tetap deka meri servis engkeman,” ku iya.