BINTANGOR: Pengerindu begulai enggau pangan diri tebantai bendar maya Komiti Pengintu Pengelantang, Pengawa Rama enggau Main Asal Dayak (JKSKD) Taman Bintang ngatur Pengerami Diri Sebilik JKSD 2012, empai lama tu tadi.
Program ke diatur Komiti Lumba Enggau Main JKSKD ti betuaika Jinggan Nyambong baka Pekit Main Futsal, Sukaneka Nembiak Sekula Primari, Pekit Nyumpit, Pekit Ngirup Ai Tuak enggau Makai Serumpu Merarau mujur merindang bala raban maya nya.
Tang sebedau nya, bala komiti meresi Padang Futsal Taman Bintang alai ngatur pengerami.
Bala apai indai, nembiak mit, tuai besai besemekih enggau pangan diri ba pekit ke diatur seraya ngerapitka agi kaul ba diri sebilik.
Sekretari Pelilih Menua Meradong, Julau enggau Pakan Andrian Luang ti bejadika pengerami nya meri puji ngagai semua raban JKSKD ketegalka ulih begempung ngemujurka pengerami nya.
Bela bisi datai ngulu pengerami tu iya nya Chairman JKSKD David Michael Jagok Tuai Raban Bansa Taman Bintang Stewert Ngabong, Kunsilor Peter Saow enggau Tuai Rumah Seli ari Nanga Liuh, Julau.