Apai indai nembiak sekula diperansang nyadi kaban PIBG

0

Ari aktiviti ti dipasuk sida dalam PIBG sekula sida ulih nemu gaya ulah enggau pemaju tikas anak diri ba bidang akademik enggau ko-kurikulum

KUCHING: Dikena ngenukuka ulah, pengawa sereta pelajar anak ba sekula, apai indai diperansang nyadi kaban gerempung apai indai enggau pengajar (PIBG).

Sekretari Politik Kepala Menteri ti mega Kaban Kunsil Nengeri (ADUN) Samariang, Sharifah Hasidah Sayeed Aman Ghazali madahka, apai indai enda tau enda chakah ngambi bagi aktiviti tauka pengawa ti diatur sekula.

“Apai indai patut nyereta aktiviti tauka pengawa ti diatur piak sekula sereta nyadi kaban PIBG, ngambika nemu nama penanggul anak maya belajar tauka besekula,” ku iya.

Hasidah meri penemu nya maya iya bejaku seraya bejadika pengawa nyuaka bantu kereban pelajar ngagai nembiak ke datai ari ruang bilik ti kurang penatai pemisi, ke dipegai iya ba sitak Kunsil Nengeri Samariang.

Pengerami nya diatur ba Pusat Khidmat ADUN Samariang ditu kemari.

Ngenang pengawa nyuaka bantu kereban pelajar, iya madahka nya nunjukka perintah amat beratka rayat ti amat begunaka bantu.

Ba pengerami nya Hasidah nyuaka bantu kereban pelajar ngagai 150 iku nembiak sekula primari ke kurang penatai pemisi ti dipilih ari 21 bengkah genturung pendiau ti dipegai sitak Kunsil Nengeri Samariang.

“Bantu baka tu nunjukka kitai chukup beratka nembiak ti begunaka bantu.

“Kitai deka meda raban nembiak ti chakah enggau gagit ati mansang ke sekula sereta ngembuan pengeransing deka belajar enggau bebendar,” ku iya.

Kelimpah ari nya, Hasidah ngarapka orang mayuh terus nyukung perintah ke diatu maya pengawa bepilih besai Ke-13 (PRU 13) ti deka diatur sebarang maya berengkah ari diatu.

Iya madahka orang mayuh patut ngelala bagi perintah ti amat beratka pengelantang rayat.

“Perintah udah ngemansutka bejuta-juta ringgit belanja dikena ngelempungka tating rayat, baka Bantu Rayat 1Malaysia (BR1M), bantu RM100 ungkup nembiak sekula enggau bantu ke bukai. Perintah udah chukup bebendar mantu rayat.

“Nya alai maya bepilih ila ngarapka rayat mayuh nyukung perintah ke diatu,” ku iya.