‘Program Aram Ngagai Sekula’ nerima sambut ke manah

0

NGEMBUAN PENGASIH: Kaban parti enggau redak dia sereta penerima program.

MIRI: Taja pan baru udah dipemun `Program Aram Ngagai Sekula’ udah mujur bendar terima kasih ngagai peranak di Kampung Jagus, Lambir.

Kepala Pas Miri, Jofri Jaraiee, nyebut pekara tu lebuh ke ngelawa genturung pendiau nya bedau lama ke udah.

“Timbal manah bendar. Mayuh apai indai enggau anak sida ngambat penatai bala kami,” ku iya.

Program nya dipungkal Sayap Indu PAS Miri nyadika aktiviti ujung taun lebih agi ngagai nembiak sekula ba kandang menua dia.

“Kami mai beg enggau keresa dikena nembiak sekula ke deka masuk besekula ungkup sessi 2013 Hari Tiga ,” ku Jofri.

Nitihku iya, bisi 50 iku nembiak ari mayuh raban bansa nerima pemeri ba genturung pendiau dia kemari.

Iya ngarapka bantu tu ulih ngurangka tating apai indai lebih agi sida ke kurang agi  penatai pemisi.

Kelimpah ari apai indai, bisi datai mega ngulu pengerami menggal mit tu nya raban komiti Indu enggau Tuai Komiti Besai PAS Miri.

Kampung Jagus dalam sitak Lambir urung 30 minit pejalai ngena kerita ari bandar.

Orang ke mangkang endur dia ari mayuh raban bansa, tebal agi Iban enggau Melayu.

Tebal agi sida nya orang bumai seraya sekeda nya gawa ba perintah enggau kompeni.