PEGI MEH NUAN BUJANG BERANI: Lungun niang Datuk Temeggong Kanang anak Langkau disan seraban 8 iku soldadu, lalu sama bisi dalam gambar, anak biak niang, Langgi anak Kanang mai gambar apai iya.
KUCHING: Pengangkun, pemerani sereta penegap penemu nengah panjung ‘Agi Idup Agi Ngelaban’ maya napi munsuh enda deka lela dibai pemegi niang Datuk Temenggong Kanang anak Langkau.
Pennangkai lungun bujang berani menua, niang Datuk Temenggong Kanang anak Langkau ba Palan Tugu Pengingat Bujang Berani Menua urung pukul 3.25 lemai kemari, di sempulang bini, anak, uchu sereta kaban belayan bukai, Sapit Kepala Menteri Datuk Patinggi Tan Sri Alfred Jabu enggau bini iya, Dato Sri Empiang Jabu lalu ditangkanka lungun ti dibap ngena menira Malaysia disan lapan iku raban soldadu, diberi penuh adat basa soldadu enggau menua.
Lubang alai numbak niang, sama endur 21 iku bujang berani bukai ke dibai pulai maya Operasi Mai Pulai dua taun ke udah ari semenanjung.
Atur pengawa belabuh enggau adat penuh soldadu ngelipat menira ari bap lungun lalu disuaka Jabu ngagai bini niang, Datin Brawang Chunggot.
Sepengudah pengawa nya, lalu ditangkan enggau sembiang betuaika Rev Michael Buma Galami ari gerija St Thomas Kathedral, lalu ditangkanka enggau pengawa ngulur lungun.
Abis atur nya, bini niang, Brawang nguluka bala sida sebilik ngulurka sengkilung bungai dalam lubang kubur lalu ditangkanka pemesai bukai ke diuluka Jabu, Menteri Kuasa, Teknologi Gadung enggau Ai Datuk Sri Peter Chin Fah Kui (ngarika Perintah Besai), Panglima Angkatan Tentera Malaysia Jeneral Tan Sri Dato Sri Zulkifeli Mohd Zin, Panglima Tentera Darat Jeneral Tan Sri Dato Sri Panglima Zulkifli Zainal Abidin, Panglima Tentera Udara Jeneral an Sri Dato Sri Rodzali Daud, Sapit Panglima Tentera Laut ngarika soldadu tasik Laksamana Madya Datuk Mohammed Noordin Ali, presiden Serakup Ex-Soldadu Malaysia (PBTM) Laksamana Tan Sri Mohd Anwar Mohd Nor, enggau Lt Jeneral Dato Seri Zaini Mohd Said (B) ngarika Penerima Pingat Seri Pahlawan Gagah Perkasa (SP) enggau Pingat Panglima Gagah Berani (PGB).
Atur pengawa ngubur tembu urung pukul 5.00 lemai. Dipelaba bisi dalam seribu iku mensia, kaban belayan enggau bala pangan iya bisi datai ngulu pengawa nya.
Lebuh dipinta mansut penemu, pengari Kunsil Adat Menua Sarawak (MAIS) madah adat ke patut diberi ngagai niang, iya nya ‘Sigi Ningka’, adat ke pemadu tinggi dalam tusun Adat Iban ba orang ke benama.
Jimbun Tawai madah, adat ke diberi ngagai niang sebaka enggau adat ke diberi ngagai Kepala Menteri keterubah suba, Tan Sri Kalong Ningkan tang semina ke bagi niang Kalong Ningkan kelia, iya dalam bagi pemesai menua.
“Niang Kanang nerima adat ke pemadu tinggi, indah ba soldadu ke diberi Yang Dipertuan Agong pen iya bulih,” ku Jimbun lebuh dikerandau Utusan Borneo kemari.
Ba adat ulit enti nitihka MAIS, ku Jimbun, dalam kandang dua minggu, lalu deka diketas kena 20 Januari tu ila di rumah niang empu di Sg Apong, ba endur iya ke mati.
“Laban iya mati dia, dia meh endur nanggam, dia iya mati, dia endur ngibun ulit, ngetas ulit,” ku iya.
Sama bisi enggau bejaku ke adat nya kemari, iya nya seiku ari bakih niang empu, Michael Riman, ke endang bisi peneleba pasal adat.
Michael tu mega seiku ari penerima midul PGB ke sama mantu MAIS netapka adat, nerangka nama kebuah iya patut diberi naka nya, pengudah diperunding enggau manah.