Ateng enggai ‘diumbuk’ agi bediri ba PRU13

0

KUCHING: Chalun Sarawak National Party (SNAP) sitak Tarat maya pengawa bepilih nengeri (PRN) suba Ateng Jeros madah iya nadai ngem­buan juluk ati deka bediri maya pengawa bepilih besai (PRU) ti ke-13.

Ateng, seiku luyar prope­syenal, madah ngagai The Borneo Post enda deka bediri agi taja pan ‘diumbuk’ enggau penyampau upah ke tinggi.

“Enti rayat ngansak aku bediri ba parlimen maya PRU13 ila, aku sigi ma­dah enda. Badu agi…sekali chukup.

“Aku diatu tetap nyukung pemangku Kaban Parlimen Mambong Datuk Dr James Dawos ke bebendar ng­etanka penuduk nya penggi Barisan Nasional (BN),” ku iya.

Iya mega madah, iya enda sesekali nerima peminta ti ngasuh iya bediri sepengudah belajar sereta bulih peneleba ngarika SNAP ba sitak Tarat maya PRN ba bulan April 2011 suba.

Ateng madah, maya iya enggau chalun bukai diasuh bediri ba sitak Tarat, sida udah didanji enggau pen­yampau upah tang maya udah tembu bepilih upah nya enda nitihka penyampau ke udah disemaya.

“Dini enggau laluh duit nya, nadai sapa orang nemu lalu ari penemu aku orang ke ngasuh kitai bediri nya semina dikena nguntungka sida aja.

“Aku enggai utai tu nyadi baru ba aku. Aku arapka ulih bejalaika pengawa dagang aku bepelasarka pemeri Tuhan ti tau dikena aku nupi ruang bilik aku,” ku iya.

Maya PRN suba, iya bediri ba Tarat ngelaban chalun BN Datuk Roland Sagah Wee. Sagah menang nengah 6,287 undi lebih.

Chalun bukai ke belaban entara tiga sukut nya suba iya nya niang Peter Ato Mayau ngarika Parti Keadilan Rakyat (PKR) teulihka 4,292 undi lalu Ateng lenyau cengkeram ke semina teulihka 567 undi ke majoriti pengundi bansa Bidayuh.