Tuesday, December 7

Penyakal nadai peluang ba Lubok Antu: Entulu

1

SIBU: Ukai muntang pen­yakal deka ngerampas par­limen Lubok Antu maya pengawa bepilih besai (PRU) ke-13 tu, ku Sapit Presiden Parti Rayat Sarawak (PRS) Datuk Joseph Entulu kemari, seraya madah Lubok Antu endang kuta kuat Barisan Nasional (BN).

“Penyakal semina deka ‘nyepi asai penyamai’ maya nganjung chalun ba Lubok Antu maya PRU 13 ila. Anang ngemaruhka penuai runding rayat menua pesisir nengah chara ngasut runding sereta bejaika perintah eng­gau atur pemansang ke udah disediaka.

“Kitai deka teulihka pemu­jur laban PRS udah nyikap diri napi PRU13 ila,” ku iya ke lalu nyadi Sapit Menteri Pemansang Menua Pesisir enggau Kandang Menua ke mega Kaban Parlimen Selangau madah ngagai The Borneo Post.

Mandal Presiden Parti Keadilan Rakyat (PKR) See Chee How andal parti nya ulih menang ba Lubok Antu iya nya seiti ari lima sitak penggi PRS.

Iya madah, PKR Lubok Antu dipelaba deka ngecha­lunka Nicholas Bawin Anggat laban iya (Nicholas) udah gawa bebendar sereta chalun ke ulih menang bepelasarka timbal nembiak redak maya pengawa bepilih ke dulu suba.

Kaban Parlimen Lubok Antu William Nyallau Badak PRS udah ngalahka Nicho­las maya pengawa bepilih nengeri 2008 nengah 1,610 undi lebih.

Taja[pia, sitak ke mayuh diuan bansa Iban nya deka betapi entara empat tauka enam sukut maya PRU13 tu ila.

Parti Pekereja Sarawak (SWP) antara sekeda parti ke udah madahka diri ngelaban semua sitak ke diungkup ngagai PRS.

SNAP mega ngining sitak ke endang kerusi asal sida baka ba Lubok Antu, Sri Aman, Saratok enggau Baram.