Jalai lama Kuching-Serian ke betiku suah ngenataika penusah bebadi jalai alun: Paul
KUCHING: Peranak ke mangkang jalai ba Km 21, jalai lama Kuching-Serian ngansak perintah ngemesaika jalai ungkup pengelikun orang ke nengah jalai nya.
Seiku deriba bas Steven Alau, 46, ke berangkutka nembiak sekula ngagai sekula sekondari ke nengah jalai nya, madah iya begulai enggau sekeda bas deriba bukai majak irau ati maya nengah jalai ke udu betiku sereta sempit nya.
“Aku besampi lalu beterimakasih laban nadai bisi nenama nyadi,” ku iya pengudah pulai nganjung nembiak sekula ari Kampung Mundai ensana.
Tuai raban bansa Kampung Maang Paul Daop madahka iya enggau sekeda tuai bukai udah sama-sama minta nengah Kaban Kunsil Nengeri (ADUN) Tarat Datuk Roland Sagah Wee Inn ngambika Opis Kereja Raya (JKR) muka jalai ke semina 8-meter pemesai kenyau ari 1980 tang enda digaga sampai ke diatu.
“Jalai batu ke digaga maya timpuh perintah koloni dalam taun 1950 suba nyambung Kuching enggau Serian aruh udah dikemanah sereta ditikitikas maya ke diatu laban tebal pengangkut berat enggi kilang batu bata enggau projek kandang manuk bekenaka jalai alun nya.
“Genap taun bisi aja nyadi kes bebadi jalai alun ti nabanka nyawa nembiak sekula ke berundang nepan mutosikal ba arung jalai nya.
“Bulan Julai tu tadi seiku nembiak indu ke diadangka ngambi peresa SPM balat bebadi pengudah iya di rudu sebuah trak 10 tan kilang batu bata lalu sebedau Hari Krismas ke udah seiku nembiak umur 19 taun ari Kampung Simpok parai belantak enggau sebuah lori ba jalai ke suah achap ai sereta betiku. Pia mega seiku pengajar indu balat bebadi udah kerita ke dikena iya tepawah lalu nyangkai ba parung,” ku iya .
Paul mega udah ngapil ngagai Majlis Perbandaran Padawan (MPP) ungkup apak jalai nya diberi api tang mega nadai nerima timbal ari sida.
Kaban Parlimen (MP) Mambong ke lalu nyadi Sapit Menteri Dagang Temuai Datuk James Dawos Mamit bulan Okt taun nyin kemari lebuh ke bejadika penyedar ngintu rampa menua madahka ngagai pemberita iya deka mai pekara tu ngagai Perintah Besai tang nyentuk ke diatu bedau bisi berita diterima bekaul enggau jalai nya.
Bisi 1,800 iku nembiak sekula ke berundang ari Kampung Beratok, Tapah, Mundai, Simpok, Sarig, Jambu, Sungai Riset, Maang, Sikuduk, Pelaman Payang, Chupak engau Panchor Dayak belajar ba SMK Tun Abdul Razak (Sekula Dragon).