Anang berumban ‘manjung ba pala wong’: Rayong

0

Rayat ba sitak parlimen Lubok Antu enda nangika pengeragak SWP ke balat ngemesaika Larry

KUCHING: Pengeragak Parti Pekerja Sarawak (SWP) ngelama tu ba sitak parlimen Lubok Antu majak didinga taja pan pengawa bepilih besai ti ke-13 (PRU13) bedau ditemu maya.

Pemujur sesebengkah parti bepanggai ba rayat, ‘ukai penginggar panjung ba pala wong’.

Kaban Kunsil Nengeri (ADUN) Engkilili Dr. Johnichal Rayong madah, sitak parlimen Lubok Antu ke diuan tebal bansa bumiputera begunaka  peranak menua nya empu ngarika sida ba politik.

“Ari pengamat pengawa politik ba sitak parlimen Lubok Antu, 90 persin sida tu peranak bumiputera bansa Iban sereta deka ke pengari ari peranak menua nya empu, sepiak ari Barisan Nasional. Nya ukai bepilih bansa tang nya meh pengamat politik.

“SWP anang guai manjung di pala wong dulu, ngumbai diri menang, laban rayat dia nemu sapa ke patut ngarika sida sereta disukung.

“Suba (sitak Lubok Antu) kala dipegai bansa bukai sereta ari menua bukai, ambika banding Baginda ari Kapit, Johnathan Krai (Simanggang) lalu diatu Presiden SWP Larry Sng deka bediri ba sitak parlimen Lubok Antu, semua sida nya dikenggaika rayat menua nya,” ku iya lebuh dikerandau pengarang berita.

Berebak enggau nya iya ti ngenang SWP udah ngerejister 8,000 kaban parti di Lubok Antu, madahka penyampau nya patut dituku kena nentuka pengamat enggau pengenda.

Iya bepenemu rayat parlimen Lubok Antu udah nemu berunding senentang politik lalu enda mudah ninga jaku selebubu ari parti penyakal, nyengkaum SWP.

Ari penumbuh SWP, parti nya (SWP) madahka diri bebakih enggau parti komponen Barisan Nasional, tang ukai enggau Parti Rakyat Sarawak (PRS).

“Kemari (ensanus) SWP madahka bisi 8,000 iku mensia di sitak Lubok Antu ngerejister enggau sida, penyampau nya bisi pengamat tauka pengenda. Tau dituku, enti amat (8,000 iku) reti iya sida udah menang, laban penyampau pengundi di sitak nya bisi 12,000 iku.

“Rayat diatu ngembuan runding ke tuai ba politik, sida deka ke pamansang. Ba orang mayuh (parlimen Lubok Antu) SWP tu penyakal, sida deka ke Barisan Nasional ti ulih meri pemansang,” ku iya.

Larry Sng ti kala nyadi Menteri Muda enggau Kaban Kunsil Nengeri Pelagus dipelaba deka bediri minta pilih di parlimen Lubok Antu, berindik ari penyuah iya dipeda nemuai ngagai sitak nya diatu.

Dulu ari nya Rayong nerima penemuai raban  Serakup Pemantu Pengawa Pengerai Nengeri Sarawak ti diketuaika presiden serakup nya, Mohd Taisin Hassan.