TERIMA KASIH: Ponar (tiga kanan) nyuaka tepa ngagai Nansian seraya diperati sida bukai.
PADAWAN: Gerija Katolik St. Mary Magdelene Kampung Emperoh Jambu ba Jalai Puncak Borneo ditu agi suntuk RM500,00 dikena nembuka projek gerija nya.
Kepala komiti gerija Paul Ponar Sinjeng madah naka kediatu pengawa ngaga gerija udah tembu 80 persin.
“Ungkus kebendar ngaga gerija tu lebih RM1 miliun lalu ungkus ngaga aja udah manggai RM870,000. Kami agi suntuk RM500,000 dikena nembuka projek,” ku Ponar bejaku ba sebengkah pengerami ba gerija nya bedau lama ke udah.
“Nya alai, kami arapka mayuh agi orang ke gerah jari lebih agi sida ari genturung pendiau nya empu datai meri duit ngambika gerija nya ulih tembu enggau lengkas.
“Sekeda ari aktiviti ke digaga kami nya ngumpul pan nyengkaum ngatur pengerami makai lemai, nyual tikit rafle, pemeri ari genap ruang bilik, enda tinggal pemeri ari Kaban Parlimen Mambong Datuk James Dawos Mamit enggau Kaban Kunsil Nengeri Bengoh Dr. Jerip Susil sereta orang mayuh.
“Gerija baru tu deka nyendiaka endur ke lantang sereta nyamai agi ungkup orang ke datai sembiang,” ku tambah Ponar madahka gerija baru nya ulih ngundan 500 iku orang datai besembiang sekali.
Gerija lama digaga urung 30 taun ke udah, lalu iya arapka gerija baru tu tan agi seraya nyadi sebengkah kelai ungkup genturung pendiau ditu.
Iya mega madahka palan alai ngaga gerija nya ba sebidang tanah ke diberi sida serumah lalu mega dia ila deka digaga sebuah balai mayuh guna.
Ba balai nya diperambu ungkup ke dikemendar nya urung RM200,000, ku Ponar.
Berebak enggau nya, Nansian dalam jaku iya, muji pengawa ke udah digaga komiti nya nengah chara nudukka wang turu kena ngaga gerija ke dikumbai iya sebuah ari gerija ke chukup manah.
“Aku andal sereta temegah gerija ke besai sereta manah amat dipeda lalu aku beterima kasih ngagai raban komiti laban udah bebendar bejalaika pengawa ngumpul duit dikena ngaga gerija.
“Manah amat kitai nya enda udu bepanggai ba pengasih orang bukai tang bekunda nyapai juluk ati kitai empu.”
“Baka sehari tu, aku nemu semua orang temegah lalu puas ati meda gerija tu laban sida nemu ari ke bekunda ngereja pengawa ngulihka pan udah ngemuaska ati,” ku tambah Nansian.
Ba kaul bukai nya ADUN Tasik Biru madahka orang ke tuai enda tau enda ngiri penemu pengarap ngagai nembiak rebak baru.
“Nengah pengarap, sida deka likun agi dalam pendiau sereta mujur, ukai semina seagi-agi diau ba dunya tu tang mega udah kitai melaling ngagai dunya sepiak,” ku iya.
Nansian mega nebah geran RM10,000 ungkup gerija nya.
Bisi datai mega ba pengerami nya rektor St. Ann Kota Padawan rektor Friar Gerard Victor, pesiden Gerempung Biperoh Dr. Benedict Poris, tuai raban bansa Bidayuh Pemancha Austin Dimin enggau peranak Kampung Emperoh Jambu.