Manyin: Sitak Baleh, Kapit deka ngasaika ubah pemansang kandang tiga taun tu ila

0

UDAH DISAIN: Kededua konteriktor Samado Sdn Bhd (dua kiba) enggau TRC (tiga kanan) betukar dokumen ke udah disain, lalu sama di kemataka (ari kiba ke kanan) Lee, Manyin, Masing, Wilson, enggau Daud.

KUCHING: Rayat ke diau di Baleh, Kapit deka ngasaika pemansang sepenembu jematan enggau jalai alun ari Baleh ke pasar Kapit nya ila.

Menteri Pemansang Infrastruktur enggau Penyambung Dato Sri Michael Manyin anak Jawong madah, jematan ke beungkus RM80 juta nya digaga nuju Baleh (ngena Pakej B) deka tembu kandang 30 bulan (jematan) enggau jalai alun (36 bulan) ari diatu.

“Nya alai, dalam kandang 3 taun tu ila, mensia mayuh ke diau di Baleh deka ngasaika pemansang infrastruktur ba sitak nya,” ku iya lalu nambah konteriktor ke bulih konterik ngaga infrastruktur nya, Samado Sdn Bhd.

Iya madah baka tu ba atur pengawa nyain konterik keterubah antara Opis Kereja Raya (JKR) enggau Samado Sdn Bhd ba renggat keterubah projek jalai ngagai Baleh HEP ke nyengkaum ngaga 490-meter jematan meraka Batang Baleh di Nanga Mujong dalam pelilih menua Kapit, di sebuah hotel antarabansa ditu kemari.

Konterik kedua disain antara JKR enggau Trans Resources Corporation Sdn Bhd (TRC) ngambika ngatur projek ngaga 18.2 km jalai alun enggau empat (4) buah jematan, renggat keterubah iya nya jalai tama ari Sangan ngagai Kapit ke nengah sitak alai arang batu di Nanga Merit.

“Projek tu dipelaba tembu dalam kandang tiga taun ngena belanja urung RM170 juta.

“Kitai untung endar laban bulih pemujur tu ke nyauka mungkur RM250 juta, lalu enti semua jalai enggau jematan tunga sitak menua nya tembu, nyangka bisi datai RM3 biliun ngaga semua projek tu,” ku iya lalu ngarapka Perintah Besai deka terus mantu ngemansangka  infrastruktur di menua nya.

Semua pelin jematan enggau jalai alun di sitak menua nya digaga JKR.

Sebedau nya, Manyin nyadi saksi ba atur pengawa nyain konterik entara JKR enggau konteriktor ke sama bisi ngangauka Menteri Kanan ti mega Kaban Kunsil Nengeri (ADUN) Baleh Tan Sri Dr James Jemut Masing, Menteri Muda Pemansang Infrastruktur Datuk Daud Abdul Rahman, Menteri Muda Penyambung Datuk Lee Kim Shin, Ketuai Pemesai Eksekutif Lembaga Pembangunan Koridor Wilayah (RECODA) Datuk Amar Wilson Baya Dandot, Direktor Unit Perambu Menua, Datu Ismawi Ismuni, enggau Direktor JKR Menua, Zuraimi Sabki.

Manyin nambah, pakej jalai tama ngagai sitak nya, opis menteri nya agi nganti ungkup ari perintah besai enggau konsultan ngambika ulih nembuka projek jalai bukai di sitak nya.

“Aku ngarapka laluh pakej nya ulih diberi dalam timpuh berapa taun tu, lalu enti udah bulih, perintah menua deka muka tender nya baru,” ku iya.

Lebuh ditanya bekaul enggau pemansang projek ngaga Jalai Sibu-Kapit, ku Manyin, projek nya begunaka belanja RM400 juta kena ngaga jalai 33 kilometer nyambung ngagai Song enggau Kapit sereta ngaga jematan di Kanowit.

“Jalai Sibu-Kapit-Kanowit panjai 110 kilometer tang bisi dua bengkah sitak ke nadai jalai, iya nya Jalai Song-Kapit 33 kilometer enggau Sungai Kanowit .

“Pekara tu udah di serah ngagai Unit perambu Ekonomi (EPU) di Kuala Lumpur dua kali lalu ngarapka nerima timbal ke manah laban enti pekara tu enda diputar jalai Sibu-Kapit enda meri penguntung penuh ngagai rayat,” ku iya.

Dalam pekara ke sama nya mega, Masing madah iya meri besai terima kasih ngagai perintah besai laban udah meri ungkup urung RM250 juta kena ngaga jalai nya ngambika mensia mayuh di sitak Baleh ulih nurun ngagai pasar kapit ngena jalai darat.

“Dalam kandang timpuh 30 bulan tu ila, kerita deka nyadi perengka pengangkut nengah jalai nya nganti jalai baka kediatu, iya nya semina ngena perau aja. Kami meri terima kasih ngagai perintah besai laban udah berundingka peneka rayat di sitak Baleh,” ku iya.