SIBU: Serakup Nyukung Nusu Tusu Indai Sibu deka ngatur Latih Nusu Tusu Indai ke diatur pengelama empat hari berunggu di Hotel Paramount kena 20 Januari tu pukul 8 pagi.
Presiden serakup Normaliza Awang Tambi madahka, latih tu ngembuan tuju deka meri penemu enggau pengelandik ngagai bala indai ke benung ngandung enggau ti baru beranak.
Ku iya, latih tu mega disukung Komiti Inisiatif Nusu Tusu Indai Sepital Sibu.
“Kitai ngarapka latih tu ulih meri penemu ngagai bala indai ti baru beranak,” pia ku iya sepengudah betuaika aum enggau bala raban ditu, ensana.
Dayang Normaliza ti mega bini Kaban Kunsil Nengeri (ADUN) Jemoreng Abu Seman Jahwie madah, komiti sida pechaya nengah latih tu, bala ke enggau masuk deka diiri enggau penemu senentang pemesai reti ai tusu indai.
“Nusu tusu indai nyungkakka agi pengerai anak laban ngundan mayuh pemaik dalam kandang enam bulan keterubah sepengudah anak ada,” ku iya madahka baru.
Pemaik tu ku iya nyengkaum mantu ngemansangka anak, ngangkatka runding enggau intelektual anak mit.