Peranak rumah panjai sitak Hulu Rajang nerima bantu ari Billy

0

KAPIT: Kaban Parlimen (MP) Hulu Rajang Datuk Billy Abit Joo beterimakasih ngagai Tuai Rumah (TR) Asun ke udah ngundang iya datai ngagai rumah panjai sida seraya meri iya awak betemu enggau peranak lalu ngarapka ulih meretika gaya penanggul ke nuntung pengidup sida.

Iya beterimakasih ngagai semua tuai raban bansa ke udah ngulu Ketuai Betemu enggau Rayat ke alai sida ulih bejuraika sekeda isu enggau penanggul ke ditapi sida.

Iya mega nerangka seagi iya nyadi MP BN. Iya agi diberi tanggungpengawa nyadung projek enggau bantu terus ngagai rayat ba sitak iya. Iya mega udah diagih Projek Mit Menua Pesisir (MRP) ke ulih mantu rayat di sitak Hulu Rajang.

“Baka ke udah dipejalaika tuai perintah besai enggau nengeri, aku chakah betemu enggau rayat meri bantu ngagai sida,” ku terang iya.

Billy arap semua ke bisi datai dia enda begilik ari BN enggau chalun BN di Hulu Rajang dalam pengawa bepilih besai ti deka datai.

Billy udah nya nyua geran MRP RM23,000 ngagai TR Asun Unggang enggau RM24,000 ngagai TR Timothy Balai dikena bebelika ramu ngambika ulih nyeruri rumah panjai sida.

Iya mega nebah geran MRP penyampau RM189,000 ngagai 27 buah rumah panjai bukai (RM7000 genap buah) dikena Komiti Pemansang enggau Pengelikun Genturung Pendiau (JKKK) bejalaika aktiviti sida dalam taun 2013.

Dulu ari nya maya ngalih hari, Billy enggau raban iya ngelawa Rumah Asun Unggang ari Rumah Jala Nating.