KUCHING: Tuai Democratic Action Party (DAP) Lim Kit Siang madah parti nya deka nyabung manuk sida ba sitak parlimen Sri Aman maya pengawa bepilih besai ke-13 (PRU13) ti deka datai tu ila.
Bejaku ba licha politik di Sri Aman kena malam Hari Minggu tu tadi, iya nyebut nama chairman DAP pampang Sri Aman Leon Jimat Donald betanding ba sitak nya lalu nyeru peranak Sri Aman meri sukung ngagai Leon.
Peminta nya ditimbal nengah tempik jari kelai sukung mensia mayuh ke begelumu urung 1,000 iku ke endang bekelungap mending licha ba mua Opis DAP Sri Aman endang diatur ungkup pengundi pesisir.
Berebak enggau nya, orang bukai ke bisi mantaika licha rambau nya, iya nya sekretari DAP Sarawak Chong Chieng Jen, mandal kepala bansa DAPSY Wong King Wei, chalun ke ulih menang DAP Mas Gading Mordi enggau Leon empu.
Leon, dalam jaku iya madahka pelilih Sri Aman nya sebengkah pelilih ke enda mansang ari lima pelilih asal Sarawak lalu mayuh perengkaguna ke beguna agi kurang bendar.
Sekeda ari pengurang nya nyengkaum bekal ai beresi lalu bisi 80 peratus kandang menua di Bukit Begunan enggau Balai Ringin nadai bekal ai beresi seraya ai di bandar Sri Aman empu kamah.
Iya mega nanya semaya perintah ke ngaga sepital baru di Sri Aman tang bedau bisi nyata disemaya deka tembu bulan April 2013.
“Taja pan kitai bisi lutur pakar ke datai sekali dalam dua minggu, tang nadai perengkaguna ke alai bala lutur ke ulih ngereja pengawa sida enggau menyana. Ditu semina sebuah ambulans ke tau diguna ari tiga buah. Kati nyawa peranak ditu enda berega?,” ku tanya iya.
Leon mega bejaku madahka gaya penyai Jalai Besai Pan Borneo lalu apak jalai ke pengambis enda menuku nya ba senentang Jalai Serian-Sri Aman laban ke mayuh belubang enggau balat beenggal-enggal.
Iya mega enda lantang ati meda nadai sekula politeknik enggau sekula vokasyenal digaga di Sri Aman seraya madahka Sri Aman nadai jalai mansang ba ekonomi tauka ulih ngetanka mudal mensia.
“Di baruh Pakatan Rakyat (PR), manah agi insentif deka diberi di baruh ‘Buku Jingga’ ke alai orang ke deka mekuh pengawa dagang deka dikemansang. Bala nembiak kitai enda ibuh bejalai jauh dikena ngidupka diri,” ku Leon.