KUCHING: Serakup Anak Bulan Mirah Malaysia (PBSM) Pampang Kuching nagit ngulihka RM30,000 ari pengawa bejualka menira mit nyerumba atur pengawa ngepunka Hari Menira 2013.
Chairman serakup nya, Datuk Dr Abang Abdul Rauf Abang Zen madah, asil ari pengawa bejual ti diatur pengelama sebulan dikena nyambung belanja ninting taun PBSM pampang Kuching ti begunaka belanja urung RM120,000 setaun.
“Nyadi sebengkah Gerempung Ukai Dikuasa Perintah (NGO), kami ngumpul duit kediri nengah macham pengawa ti diatur baka nyual menira dikena ngiga belanja PBSM pampang Kuching ti nadai mayuh nerima geran ari perintah,” ku iya bejaku ngagai pemberita kemari.
Dulu ari nya iya ngulu pengerami bejadika Hari Menira 2013 PBSM Pampang Kuching ti dipenyadika Kepala Menteri Pehin Sri Abdul Taib Mahmud ba opis iya di Wisma Bapa Malaysia ditu, kemari.
Pengerami nya kemari mega digulu Penyanding Penemu PBSM Pampang Kuching Datuk Abang Abdul Karim Tun Datuk Abang Openg enggau sapit chairman Dr. Chou Chii Ming.
Abang Abdul Rauf madah, tebal ari belanja gerempung nya dikena ngatur kimpin meri darah iya nya urung RM50,000 setaun kelimpah ari dikena mantu orang ti kena tasah bah, angus enggau ke bukai.
“Kimpin meri darah iya nya aktiviti pemadu besai kami lalu aku ulih madahaka pampang kami pemadu mayuh meri bekal darah ngagai Sepital Besai Sarawak (HUS), baka nya mega St John Ambulance.
“Semua kaban kami tebal agi BAD (nembiak) iya nya raban orang ke ngereja pengawa ngatika diri enggau enda bebayar lalu sida mega pemeri darah,” ku iya.
Berebak enggau nya iya ngelalau sekeda raban pemeri darah ti numbuhka gerempung kediri apin lama, laban ku iya ulah nya ngelanggar atur perubat enggau raban bansa.
“Pengawa meri darah tu nitih peneka diri. Kitai enda ulih ngansak orang meri darah lalu udah nya diberi upah enda ngira bansa upah. Nya udah ngelanggar etika enggau undang-undang.
“PBSM besedia meri kerejasama ngagai gerempung nya ngatur kimpin meri darah ke guna mensia mayuh,” ku iya.