LAPOK: Menteri Muda Perengkaguna Mensia Mayuh (Bekal Ai) Datuk Sylvester Entri Ak Muran ngansak nembiak SMK Tinjar ditu nagit bulih pemutus peresa akademik ti manah.
Bejaku maya nyuaka bantu Sekula RM100 enggau 30 buah Tangki Ai 1Malaysia ba sekula nya, madah iya deka nyukung ari segi belanja enggau peminta bukai tang ngansak nembiak sekula nya teulihka pemujur peresa ti manah kena ngangkatka sekula nya antara sekula ke tebilang.
“Bisi bida maya sekula suba enggau kediatu.
Diatu mayuh perengkaguna dikena ngulihka pemandai sereta muntang agi,” ku iya.
Berindik ari nya, nembiak rebak baru aruh begunaka awak nya ngambika mujur agi ba pelajar sida, ku iya.
Iya berasai gaga ati laban SMK Tinjar udah berengkah ngambi nembiak ari Baram belajar ba sekula nya, lalu iya ngarapka kelebih agi nembiak ari menua pesisir belajar bebendar ngambika mansang ba akademik enggau aktiviti kokurikulum.
Entri ke mega Kaban Kunsil Nengeri (ADUN) Marudi ngelalau nembiak ngerebut awak ke bisi disediaka ba SCORE.
Perintah menua mega bisi nyendiaka sekim TERAS kena ngangkatka pengelandik enggau latih ba bidang teknikal.
Entri mega bisi numbuhka sekim peransang pelajar berengkah ari1996 ungkup nembiak ke mujur ba peresa UPSR, PMR, SPM enggau STPM.
SMK Tinjar udah dipenyadi Sapit Menteri Besai ke mega Menteri Pekara Pelajar Tan Sri Muhyiddin Yassin bisi ngagihka RM3 miliun ungkup projek pemansang bekal ai maya penemuai iya kenaka 25 Feb taun nyin tadi.
30 buah Tangki Ai 1Malaysia kelai semaya nya dikeamatka ngambika sekula nya ulih nyimpan mayuh ai ke guna ninting hari.
SMK Tinjar betapi enggau penanggul kurang bekal ai lalu projek nya disadang ulih mutarka pekara nya.