Melissa Francis Merindang Ba Malam Final Betong Idol 3

UKAI senang ngatur pengawa, kelebih agi enti pengawa nya nyamai endur orang mantah tauka ‘dikritik’. Orang ke mantah nyangka tuchum aja laban sida puas tang orang ke dibantah tau remuk ati baka kacha ke pechah terempas atas batu. Anak seni ke tulin ngereja pengawa mayuh agi pulai ke pengaga enggau pengelantang orang bukai; enda nyalah-nyalah baka dian ke meri penerang ngagai semua orang. Sida gawa enda ngira jam lalu jauh agi ke minta balas laban sida ngembuan pengerindu ke chukup dalam ba bidang seni ti endang dikerinduka sida.

Senario di atas nya tadi ngayanka semua ‘anak seni’ ke benung aktif ba industri pemerindang di menua tu; enda milih bansa seni, asal iya besangkup-paut enggau main asal tauka jaku kitai. Taja pan pia, ba sukut Pemerindang kitai ke minggu tu aku mai kita beratika pemanah pengawa Pengetua Betong Idol 3, Philip Jabu enggau raban komiti iya ke udah tiga taun bejejurut ngatur pekit belagu ke dikumbai Betong Idol. Betong Idol udah mansutka mayuh ‘bakat’ baru ba pengawa belagu lalu sekeda ari finalis Betong Idol 1 enggau 2 bisi udah nyadi rekoding artis lalu seiku enggau orang masuk pekit Vokal – Bukan Sekedar Rupa di Kuala Lumpur, ngarika Sarawak.

Kena 23 Februari (Hari Enam) tu tadi, aku bisi dikangau nyadi hakim raun semi-final pekit nya ke diatur ba Dewan Mini Stadium Betong ke alai enam belas iku sida sama enggau berebutka peluang ngagai raun final. Entara idol semi-final iya nya Idol Zahra, Idol Adam, Idol Shira, Idol Hajar, Idol Azri, Idol Abby, Idol Jessica, Idol Patricia, Idol Jackson, Idol Ozi, Idol Ismail, Idol Sherry, Idol Hidayat, Idol Zaidi enggau Idol Thomas.

Ba raun semi-final Betong Idol 3, komiti pengatur semina milih sepuluh iku finalis ba Kategori Terbuka enggau Kategori Lagu Iban. Ba Kategori Terbuka, sida ke enggau masuk final iya nya Idol Zahra, Idol Adam, Idol Shira, Idol Hajar enggau Idol Azri. Lima iku finalis Kategori Lagu Iban iya nya Idol Abby, Idol Jessica, Idol Patricia, Idol Roy enggau Idol Jackson. Renggat final Betong Idol 3 deka diatur kena 16 March 2013 ba Dewan Stephen Kalong Ningkan di Betong. Masuk enda bebayar.

Renggat semi-final Betong Idol 3 apin lama tu tadi mega nyadi pekit kepenudi ngagai Idol Ozi, Idol Sherry, Idol Ismail, Idol Hidayat, Idol Zaidi enggau Idol Thomas laban jereki sida sebuat semina naka nya aja. Taja pan pia, kitai arapka sida enam enda jenga laban jereki enggau peluang kitai bisi ba sebarang maya enggau di sebarang alai.

 

Tau Dipuji

 

Munyi ku aku ba pun tu tadi, ngatur sebengkah-sebengkah pekit ukai mudah. Baka nya ga Betong Idol. Enti nadai orang ke bepenemu pasal dunya pemerindang, program nya tentu enda nerima sambut ke manah ari mensia mayuh.

Ari gaya orang ke datai ba malam semi-final, aku ngasaika Betong Idol bisi gaya enggau imej kediri tauka “aura” iya empu. Pengetua Philip Jabu enggau kaban komiti iya kenyau ari Betong Idol 1 suba tentu enggau pengabis penau sida ngemanah sereta ngelakuka program nya. Bepanggai ba sambut mensia mayuh enggau bala pemekit, Betong Idol chukup signifiken nyadi siti menalan endur sida ke bisi ‘bakat’ ba pengawa belagu ngujika pengelandik diri. Kelimpah ari nya, Betong Idol mega ulih ngerapitka kaul entara pupu raban bansa di pelilih Betong laban pekit nya tebuka ngagai semua.

Kitai arapka Betong Idol ulih terus diatur ba taun-taun ti deka datai tang nyangka patut bisi ubah baru tauka ditambah ba sekeda chara enggau sistem pekit. Kitai ukai semina arap tang pechaya mega ke Pengetua Philip Jabu enggau komiti iya bisi runding enggau penemu ke manah agi dikena ngangkatka Betong Idol nyadi pekit ke lebih tinggi agi dudi ila. Ba utai ke dipeda aku empu, Betong Idol tau dipuji sereta ngasuh kitai temegah!

 

Malam Final Betong Idol 3

Ditanya nama utai ke ulih narit mensia mayuh ba malam final nya ila, Pengetua Philip Jabu madah, “Aku arapka mensia mayuh, kelebih agi sida ke diau di pelilih Betong bela sampal datai. Mayuh utai ti tau narit ati sida. Kelimpah ari meda pemendar enggau gaya perindang sepuluh iku finalis, mensia mayuh ke datai mega deka diperindang artis kitai ke pemadu popular maya tu, iya nya Melissa Francis. Kelimpah ari Melissa, kami mega bisi ngangauka artis popular bukai tang naka ke diatu aku bedau ulih nyebut nama sida nya lalu masuk enda bebayar”, ku Pengetua Philip Jabu meri penerang pasal malam final ti deka diatur sida kena 16 March 2013 ba Dewan Stephen Kalong Ningkan di Betong.

Philip Jabu mega bisi madahka sepuluh iku finalis deka diuji ba siti pengerami sebedau sida datai ba malam final nya. “Sebedau sida berebutka gelar champian ba malam final nya, sepuluh iku finalis nya deka ngaga siti roadsho keterubah ba Pesta Bungin kena 8 March 2013. Konset nya kira ke dikena sida ngemanas sereta nelebaka diri belagu ba mua orang mayuh”.

Nasit siku-siku kitai enda ulih dijangka ! Baka nya mega sida ke enggau bepekit. Sida tau menang lalu tau mega alah laban nya sigi udah adat pekit. Udah pekit, sida nyangka tetemuka peluang baru kelebih agi enti bisi rekoding kompeni ngambi sida nyadi artis rikut. Ba siti-siti pekit, utai ke pemadu beguna ukai ‘trofi juara’ tang peneleba enggau nama kitai ke udah enggau masuk pekit nya. Kadang-kadang champian ba siti-siti pekit tau dudi agi nyadi artis rikut laban kompeni rikut ukai milih sapa champian tang gaya vokal enggau genre muzik ti ke digaga sida ari bala pemekit. Enggau nya, kitai arapka semua finalis belagu enggau naka alah diri, ngena chara enggau gaya diri; enda niru gaya orang lalu bantaika meh kreativiti enggau identiti diri ti bendar.

 

Artis Popular

 

Apin lama tu tadi, seninjik mega aku sempat berandau enggau Melissa Francis pasal iya ke diambi nyadi artis dipebasa ba malam final Betong Idol 3 kena 16 March nya ila. Jangka aku, mayuh orang udah nemu Melissa Francis mega siku artis ‘sensasi’ kitai Iban ke bisi dichalun ba kategori Most Stylo (nengah undi online) ba Gelar Bintang Pegari Berita Harian (ABPBH).

“Aku madahka pengaga ati diri ngagai semua finalis Betong Idol 3. Ngagai bala peminat, aku arapka sida sama bela sampal datai ukai semina ketegal aku seiku tang sama-sama meh kitai nyukung bala finalis enggau pengawa Betong Idol”, ku Melissa Francis enggau chara ngerampas enggai lepas peluang bepesan ngagai peminat iya di serata Sarawak kelebih agi sida ke diau di pelilih Betong.

Ditanya nama lagu enggau pemayuh lagu ti deka dibai iya malam nya ila, Melissa Francis madahka pekara nya bedau diputuska komiti pengatur tang taja pan pia ku iya, manah agi peminat iya terus betemu enggau iya ba Dewan Stephen Kalong Ningkan laban peluang ke bansa nya ku iya enda suah.

 

Simpul

 

Kitai arapka Betong Idol ukai semina naka Betong Idol 3 tang kitai mega arapka iya agi ditampung ba taun-taun ti deka datai. Ngagai bala nembiak enggau kitai bukai ke bisi pengelandik ba pengawa belagu, anang lembau enggau masuk audisyen laban sekali nuan nyingkang, iya nyangka tau ngubah nasit enggau pengidup nuan.

Sebedau kami duai ngelengkaka randau, Pengetua Philip Jabu sekali agi bepesan ngagai mensia mayuh. “Kami raban komiti Betong Idol 3 bedanji deka ngaga perindang ke nyelai ari ke selama. Datai meh enggau tumu laban endur duduk enda mayuh seraya nyukung sepuluh iku finalis malam nya. Aku mega minta sida ke ari luar menua Betong sama bela datai laban penatai bala kita besai endar reti ba kami. Betemu meh kitai ba malam final Betong Idol 3 (Pencarian Superstar) kena 16 March 2013 ba Dewan Stephen Kalong Ningkan”, ku Pengetua Philip Jabu ke maya nya sama dikemataka artis baru Stephanie enggau penanyi Bujang Lelingai, Margaret M Jalang, orang kuat ba Betong Idol musin ke-3.