OSCAR LING CHAI YEW
SIBU: Taja pan chalun nganti Kaban Parlimen Sibu Wong Ho Leng empai dibantaika tuai Parti Tindakan Demokratik (DAP) tang nama Oscar Ling Chai Yew udah bisi didinga nyadi chalun bagi penuduk nya maya Pengawa Bepilih Besai Ke-13 (PRU-13) deka datai.
Iya ke beumur 36 taun dipeda ngembuan penau nyadi chalun nganti Ho Leng lalu udah maruk diri enggau DAP berengkah ari bulan Julai 2009 suba sebedau dichiri nyadi pemantu Ho Leng kenyau empat taun ke udah.
Penemuai Ling ngagai sebengkah rumah enggi orang seranta di Jalai Tong Sang ditu ngeringka agi jaku madahka iya nyadi chalun nganti Ho Leng.
“Enti diberi awak bediri ba Parlimen Sibu aku naka alah megai tanggungpengawa nya.
“Aku mega udah besedia gawa ke rayat enti sida meri sukung ngagai aku,” pia ku iya maya dikerandau kemari.
Iya mega madahka diri pechaya DAP ulih menang ba PRU13 tu lalu ngetanka Parlimen Sibu.
“Kebuah pia laban ba pengawa bepilih mit suba undi ari raban bansa China iya nya bisi 66 persin.
“Raban bansa China meri sukung ke tegap ngagai DAP lalu undi ari Bumiputera enda nyukung parti ke ngelaban kitai.
“Tang kitai enda irau laban undi ditu majoriti iya datai ari raban bansa China,” ku iya.
Ling madah, rayat di Sibu mega udah tuai runding nentuka sapa bagi ke patut disukung nyadi pengari sida.
“Rayat lebih agi dekaka ubah ukai ngira sapa chalun tang meda sapa parti nya.
“Pekara tu nejuka DAP ukai semina tebilang di Sibu tang mega jelai nama ba mengeri besai di nengeri tu,” ku iya madahka baru.
Kena 23 Februari tu tadi, Ho Leng madahka diri enda bediri agi ngetanka Parlimen Sibu ba PRU13 ketegal pengerai.