KUCHING: Bup ti nyeritaka mayuh bansa pemakai asal di Sarawak tau bendar ngangkatka penyelai nama menua tu ngagai orang ari menua bukai.
Sapit Kepala Menteri Datuk Patinggi Tan Sri Dr Alfred Jabu madah tiap pupu bansa ke bisi di Sarawak ngembuan pemakai asal diri empu ti ngarika gaya pendiau diri ti udah matak mayuh orang ari menua luar datai bejalaika pansik.
Ku iya, sepenyampau 27 pupu raban bansa di Sarawak ngembuan pemakai asal ti mengkang diintu manah nyentuk ke diatu lalu pemakai nya mega mandangka identiti tiap pupu raban bansa.
“Sarawak ngembuan bemacham pemakai asal ti tebal agi datai ari utai kampung. Pansik ti dipejalai tau endar ngangkatka pemakai tu dikelala serata menua.
“Pengangkun sekeda orang ti udah nulis senentang bansa pemakai asal tu mega mantu ngerembaika pemakai asal menua Sarawak,”ku iya seraya ti madah sekeda bansa pemakai tu udah dijula di restoran di Sarawak emggau Semenanjung Malaysia.
Iya mansutka jaku tu ba pengerami bejadi Bup Food Heritage of Sarawak ke ditulis Heidi Munan di laman Dewan Tun Abdul Razak, Muzium Sarawak ditu kemari.
Iya mega madahka nengah pansik ke silik, rempah ti dikena raban bansa Sarawak ke tebal agi diambi ari kampung tau enda r dikerembai ngambika ulih ngadaka pemakai bukai.
Bup Food Heritage of Sarawak nyeritaka pemakai asal bansa Sarawak ti udah ngaitka enggau gaya pendiau tiap pupu raban bansa.
Bela datai Sapit Menteri Pemadah, Penyambung enggau Main Asal Datuk Joseph Salang Gandum, Pesuruhjaya Opis Pesaka Menua Prof Emeritus Dato Zuraina Abdul Majid, Menteri Muda Kandang Kunsil Mneua Datuk john Sikie Tayai, penulis bup Heidi Munan sereta orang bukai.