Raban 845 Royal Air Squadron mulaika pengingat di Kapit

0

KAPIT: Kaban parliman Ka­pit Datuk Alexander Nanta Linggi ngarika sida sebi­lik enggau perintah menua Sarawak meri terima kasih ngagai raban ari 845 Royal Naval Air Squadron ti udah nemuai ke Kapit.

Raban 19 iku nya diarika 16 iku ke gawa nyadi pemesai lalu 3 iku veteran, dua iku ari veteran nya kala gawa ba Nanga Ga’at, Baleh ari taun 1963 nyentuk ke taun 1966, 48 taun ke udah. Neil Burns Thomson 74 taun enggau Mike Thompson 71 taun mengkang idup taja pan dita­banka helikopter labuh.

Kena 14 April taun 1965, Neil nadai nenama lebuh he­likopter wessex labuh ba ulu Mirirai, Batang Baleh ketegal bisi penyai ba sistem.

Iban ba menua nya ngelar iya ‘Antu Gayu Ulu Mirana’. Kena 4 March taun 1965, semina seiku Mike aja ke idup ari lapan iku ke diundan helikopter ke labuh ba Sungai Puro, urung 15 batu ari ili Nanga Ga’at.

Alexander bejaku munyi nya ba rumah iya di Jalai Puan Sri Tiong, maya pengerami makai lemai nyambut penatai soldadu British nya kena lemai 9 March tu tadi, nyerumba penemuai tiga hari ngagai Kapit. Raban nya datai di Kapit kena 8 March.

“Kami amat ngarapka kita nemuai ke Kapit baru sepen­gudah 48 taun. Ukai nyamai nengah pejalai ke jauh, 14 jam numpang bilun ari Lon­don ke Malaysia. Penemuai kita tu besai amat reti laban Sarawak taun tu deka ngintu penumbuh ti ke-50 masuk gempung Malaysia.

“Kami nemu kita meh bakih kami. Uji kita nanya sekeda orang ditu, enti sida nemuai, menua ti deka digusung sida. Nyauka serap orang ditu madahka menua England. Ke­limpah ari nya, sida nemu amat pasal English Premeir League (EPL) ”, ku Alexander.

“Taja pia, pekara nya bedau chukup dikena mandangka penaluk kami ngagai pengawa ti udah dikereja 845 Royal Air Squadron di Kapit enggau Sarawak. Skuadron 845 udah gawa ditu tang datai nemuai kitu ngabas tiang pengingat ba Nanga Ga’at ke dikena ngelai bala kaban soldadu sida ke udah parai dia.

“Nengah penemuai tu, kami deka nyendiaka pelasar ke manah agi dikena nge­manahka kaul. Taun tu, aku meri RM 10,000 geran ari perintah dikena ngemanahka agi batu pengingat nya laban batu pengingat nya meh ti nyadi kelai ke kitai semua,” ku iya.

Berebak enggau pengerami nya mega , Alexander lalu nyuaka tepa ngagai ketuai raban nya, Leftenan Mark Christopher Mason.

Mark lebuh ke bejaku ma­dahka, iya enda nyadang pen­emuai sida nerima sambut ke manah amat. Kami berasai gaga endar ati. Kami arapka ulih diau ditu belama. Kami mega arapka penemuai tu ulih nyadi penyintal kaul kitai belama. Kami meri terima kasih laban udah meri RM 10,000 dikena ngemanahka batu pengingat nya ngambika tan lama nyen­tuk ke uchu kami jemah ila.

“Ungkup pemesai sereta rayat di Kapit, kami meri besai terima kasih laban udah ngelaluka penatai kami kitu. Nyadi siti ari basa ngagai kami ke datai kitu betemu enggau kita sereta bekunsika pengingat nya ”, ku iya.

“Terima kasih mega nga­gai Kaban Parlimen Kapit, Datuk Alexander Nanta Linggi, Sapit Ketuai Opis Kunsil Pelilih Kapit, Jef­ferson Jamit, Residen Kapit, Dahim Nadot sereta semua ti bekaul enggau penemuai kami tu ke dikumbai, ‘Down The Memory Lane’.

“Genap iku kami bera­sai gagit endar ati senentang pekara ke nyadi entara taun 1963 nyentuk ke taun 1966, maya konfrantasi entara Malaysia enggau Indonesia. Kami semua datai ari England nemuai ngagai Nanga Ga’at, Batang Baleh ke alai 24 iku soldadu British sudah parai kena 12 April taun 1965 dita­banka dua buah helikopter Wessex labuh.

“Batu pengingat Nanga Ga’at digaga dalam taun 1970. Kelimpah ari nya bisi mega kaban ari Royal Air Naval Sta­tion England datai ke Kapit meri basa ngagai kaban sol­dadu ke parai maya penyarut ke nyadi, iya nya Indonesia ngelaban pengawa numbuhka menua Malaysia bepun ari menua tu udah merintah diri kelia ”, ku Mark

Seraban 16 iku sida ke nemuai kitu nyengkaum Mejar Mark, Leftenan Chris­topher Mason, Leftenan Julia Davies, David Hoogewere, Nick Charlesworth, Andrew McMaster, Lee Catelani, Aaron Cross, JamesPhilips, Freddy Durrant, Steve Bow­man, Scott Holliday, Lee Andrews, Matt Heal, Charlie Preschardt enggau Gaz Ae­mes. Tiga iku soldadu veteran British iya nya Cyvil Good­hand, Neil Burns Thomson enggau Mike Thomson.

Cyvil kala gawa ba Bagi menua Kuching ari taun 1963 nyentuk ke taun 1966 ti mungkur Kuching, Serian, Bau enggau Lundu. Neil eng­gau Mike kala kena serang ba Bagi menua Sibu lebuh be­jalaika pengawa nyaga menua Kanowit, Song enggau Kapit. Neil seduai Mike bestesyen ba Nanga Ga’at maya British belaban enggau pengeruga menau ari Indonesia.

Sama bisi ngulu pengerami nya Kaban Parlimen Hulu Rajang , Datuk Billy Abit Joo, Kapit Resident, Dahim Nadot,D.O, Elvis Didit, chair­man Gerempung Ex-Soldadu pampang Kapit , Wilfred Billy Panyau, Sapit ketuai Opis Kun­sil Pelilih Mit Kapit, Jefferson Jamit, Pemesai Warran Marin 9 Briget Sibu, chairman Serakup Dayak Sarawak( SDNU), Joseph Jinggut enggau chair­lady SID, Minor Panyau.