Bako National Park nyadi palan ngaga filem Jepun

0

KUCHING: Bako National Park deka nyadi palan ngaga filem Jepun berengkah ba bulan April taun tu.

Filem ke digaga 42 Picture SB nerima geran ari Perbadanan Kemajuan Filem Nasional Malaysia (FINAS) nya mega deka matak sekeda pelakun ari menua Jepun begulai enggau pelakun menua tu.

Direktor 42 Picture SB Yasu Tanaka madahka Bako Nasional Park dipilih ketegal ti ngembuan rampa menua ti manah ke jarang ditemu ba serata dunya.

Iya ke kala ngelawa palan nya sebedau tu netapka filem nya ila deka mantu ngelakuka Bako National Park sereta menua Sarawak ngagai rayat di menua luar.

“Rampa menua Bako chukup nyelai ke nadai dikembuan ba menua Jepun.

Aku teulihka pikir ngaga filem ditu ba penemuai kami duai bini aku dulu agi ari tu.

“Kami udah besedia lalu nengah bantu geran ari FINAS, filem tu deka ngelakuka Bako National Park ngagai menua luar,”ku iya ba sebengkah aum pengarang berita kemari.

Tanaka ti enggai madahka nama filem madah filem nya mega deka digaga di Kuala Lumpur sepengelama tiga hari, kelimpah ba Bako National Park.

Filem nya nusuika pengidup sepasang melaki bini ti napi penyarut begulai ke alai seduai datai nemuai baru ngagai Bako sepengudah nemuai 10 taun ke udah maya nanggam pengerindu.

“Mayuh macham pekara nyadi maya seduai diau ba Bako,”ku iya seraya ti madah filem nya deka pansut ba taun 2014.

Tanaka mega madahka sekeda pelakun nengeri Sarawak deka diambi belakun kena ngemujurka filem nya.

42 Picture SB kala ngaga filem nengah kerejasama enggau FINAS kenyau ari taun 2009 lalu dipandangka ba Astro.

Bela datai ngulu aum pengarang berita Ketuai Kandang Menua Sarawak FINAs Mohammad Subri Abdul Ghani, Sapit Direktor Mohamad Hanifah Abdullah, Direktor of Photography Maxmillan Schiege enggau Pengeluar Filem Bea Tanaka.