Billy disadang ngulu pengerami ke diatur ba Rh Jampong, 16 March

0

KAPIT: Kaban Parlimen Hulu Rajang, Datuk Billy Abit Joo deka ngulu program Ketuai Begulai enggau Rayat ke diatur ba Rumah (Rh) Jampong Anak Meng, Nanga Banyau, Baleh kena 16 March tu.

Ba pengerami nya, Billy disadang bejadika komisyen Projek Bekal Ai Menua Pesisir rumah panjai nya ba baruh projek mit menua pesisir (MRP).

Pengerami nya diatur ulih Opis Residen Kapit berengkah ari pukul 5 lemai, ngatur pengawa randau enggau peranak rumah panjai nya sereta bala tuai raban bansa ke besemak rumah panjai nya.

Tukang pengerembai berita pengatur pengerami nya madah kena narit ati mensia mayuh datai sampal ngulu pengerami nya, dua iku penanyi Iban tebilang deka dikangau merindang iya nya Paul Erika enggau Urai.

Nambahka nya mega, raban main asal Orang Ulu ari Belaga deka mantaika pengelandik ngajat enggau main asal sida kebukai ba pengerami nya.

Rumah Jampong dientak ba Jalai Melekun-Mujong, iya nya urung 20 minit pejalai ari pasar Kapit.