Nanta arapka perintah nengeri numbuhka palan nya kena napi peminta SCORE
KAPIT: Sitak tu ngarapka perintah nengeri numbuhka sebuah palan pelajar tauka institusi teknikal kena napi pemansang projek SCORE.
Kaban Parlimen Kapit Datuk Alexander Nanta Linggi madahka, rayat ba sitak nya bela enggai tinggal ari program pemansang perintah kelebih agi baka SCORE.
“Kami ditu (Kapit) gaga laban diserangkum dalam projek SORE tang taja pia, kami ngasaika diri tinggal ari pemansang tu.
“Semua tu mai besai reti ngagai nembiak menua pesisir nyengkaum ari Song enggau Belaga,” ku iya.
Iya mantaika pekara nya maya ngulu pengerami Ketuai Begulai enggau Rayat ba Dewan Suarah Kapit di Kapit ditu, hari Dua tu tadi.
Ku Alexander, taja pan sitak Kapit apin disambung jalai tang penyampau kerita tauka perengka pengangkut ke bukai majak nambah ninting hari.
“Beduduk ari nya kami ditu suntuk endur paking kerita.
” “ “Nya alai, aku arapka perintah ulih numbuhka sebuah palan paking beringkat digaga ba pasar Kapit,” ku iya seraya madah ungkus dikena ngaga projek nya urung RM11ngagai RM12 miliun.
Maya tu mega Nanta ngarapka projek ngaga rumah tauka opis ex-soldadu bagi menua nya ulih dipejalai enggau lengkas.
Ku iya, projek nya lama udah dilanggur tang proses ngemendarka projek nya lalu apin ulih dipenyadika.
“Pelaba aku, projek tu nadai kebuah lama dikemendarka laban tu sebengkah ari chara kitai ngenang pemerani bala ex-soldadu menya ngetanka menua tu,” ku iya.
Kelimpah ari nya, Nanta mega ngansak perintah nengeri bejadika projek tauka ngiga palan alai ngaga rumah ungkus murah ungkup rayat menua nya.
“Penyampau rayat ke mindah ari rumah panjai ngagai kandang mengeri majak nambah ninting hari ti nejuka rumah ungkus murah tu engkeman digaga.
“Kitai enggai sida bisi ngaga rumah nadai pemendar ba endur ti enda patut.
“Pekara tu ukai semina ngeruga pemanah rampa menua tang tau ngujungka penusah rama ke bukai nyadi,” ku iya lalu arapka projek nya mega tau digaga ba menua bukai nyengkaum Song.
Pengerami sehari nya dipenyadika Kepala Menteri Pehin Seri Abdul Taib Mahmud.
Bela bisi datai maya tu iya nya Sapit Kepala Menteri Datuk Patinggi Tan Sri Alfred Jabu anak Numpang, Menteri Muda Pemansang Perengka Guna (eletrik enggau perengka penyambung), Dr Stephen Rundi, Menteri Muda Main Asal Liwan Lagang, Kaban Parlimen Kapit Datuk Alexander Nanta Linggi enggau Kaban Parlimen Hulu Rajang Datuk Billy Abit Joo, Kaban Kunsil Nengeri (ADUN) Katibas Datuk Ambrose Blikau enggau Kepala Pemesai Sarawak Energy Berhad Torstein Dale Sjoveit.