Perintah berunding nambahka nembiak Bumiputera dalam program ACCA enti nerima peminta ke tinggi

0

KUCHING: Perintah nengeri deka berunding nambahka penyampau nembiak Bumiputera Sarawak nampung pelajar nengah Skim Pendidikan dan Latihan ACCA, enti bisi peminta ke tinggi.

Pekara nya dipadahka Menteri Muda ba Opis Kepala Pelajar (Pengatur Pemansang Teknikal Pelajar) Datu Len Talif Salleh ngagai pengarang berita ditu kemari.

“Kena mungkal program tu, kitai milih 30 iku nembiak Bumiputera Sarawak ke patut belajar dalam timpuh setaun.

Kitai beratika dulu timbal ari bala nembiak, enti manah, penyampau masuk program tu deka ditambah.

“Kitai beratika pesereta nembiak Bumiputera dalam bidang tu (perakaunan enggau kewangan) agi kurang, nya kebuah kitai deka chakah bejalaika program sereta nambahka penyampau nembiak Bumiputera nengah program tu.

“Aku ngarapka penerang bekaul pekara tu ulih dikerembaika ijinsi ti bekaul ngagai menua pesisir, ngambika ulih ngerebut sereta ngena peluang ke bisi,” ku iya.

Dulu ari nya Len ngemataka pengawa nyain sempekat (MoU) entara TERAJU@Sarawak, Yayasan Sarawak enggau Kolej Sunway Kuching ti keterubah iya nyendiaka Skim Pendidikan dan Latihan ACCA.

Director Kanan, Stakeholeder Management TERAJU (Unit Peneraju Agenda Bumiputera), Norizan Sharif lebuh bejaku ba pengerami MoU nya madahka, tuju sempekat nya diatur kena nyendia sereta ngemujurka Skim Pendidikan dan Latihan ACCA ti nyendiaka pelajar bidang ‘perakaunan’ enggau ‘kewangan’.

Program tu mega nyendia, nyikap enggau meri pengelandik ngagai nembiak Bumiputera sereta bulih Certified Accounting Techincian (CAT).

Nitihku iya, ba taun 1970 semina bisi 221 iku Bumiputera ke ngambi bagi ba lapan pekara profesyenal ti nyengkaum akauntan, luya enggau kebukai.

Nyentuk ke diatu kitai bisi 80,000 iku orang profesyenal serata menua, ku iya.

“Udah bisi penyulut, tang semua nya bedau chukup laban agi bisi Bumiputera ke agi tinggal,” ku iya.