KUCHING: Penyampau bansa Bumiputera ke nyadi kaban ACCA naka 12 Oktober 2012 semina 14 iku aja ari 542 di serata Sarawak.
Kepala Pegawai Eksekutif, Kolej Sunway Kuching, Joseph Lim madahka, penyampau nya kelalu mimit sereta bedau datai ba tikas ke patut.
Nya alai ku iya, kena nambahka pemayuh bansa Bumiputera di nengeri tu belajarka pekara nya sereta nyadi kaban ACCA, program Pelajar enggau Program Latih ACCA diatur begulai entara TERAJU (Unit Peneraju Agenda Bumiputera), Yayasan Sarawak enggau Kolej Sunwaw Kuching.
“Naka 12 Oktober 2012, penyampau bansa Bumiputera ke nyadi kaban ACCA semina 14 iku aja ari 542 di serata Sarawak.
Nya semina ngayanka 2.58 persin ari penyampau ke direjister.
“Nya alai juluk Pelajar enggau Program Latih ACCA diatur ngambika pemayuh nembiak Bumiputera di Sarawak belajarka CAT (Certified Accounting Technician) enggau ACCA tau nambah sereta nyemelaka penyampau entara Bumiputera enggau ukai Bumiputera ba profesyen tu.
“Ari nya penumbuh pemansang mudal mensia mega ulih napi penengkebang industri baru ba SCORE,” ku iya lebuh bejaku ba pengerami nyain sempekat (MoU) entara TERAJU@sarawak, Yayasan Sarawak enggau Kolej Sunway Kuching ti diatur ba sebengkah hotel ditu kemari.
Ngenang MoU nya iya madahka, ari baruh pemereti penemu Yayasan Sarawak enggau TERAJU deka nyendiaka saup ngagai 31 iku nembiak Bumiputera Sarawak belajarka program CAT ba Kolej Sunway Kuching berengkah April 2013.
Ku iya nengah kerejasama nya, Yayasan Sarawak nyendiaka duit jali dikena mayar yuran pembelajaran, yuran pengerejister, yuran ninting taun enggau yuran peresa.
TERAJU@Sarawak enggau Kolej Sunway Kuching besaup milih enggau nentuka nembiak ke patut sereta udah mujur dalam “CAT Programme to Employers” dianjung gawa ba firma perakaunan ke senipak di Sarawak enggau kompeni TERAS di baruh TERAJU@Sarawak, ku iya.
Nembiak Bumiputera ke dipilih masuk program CAT ba Kolej Sunway Kuching pengelama setaun, bepelasarka pemutus peresa Sijil Pelajaran Malaysia (SPM) ambis nadai 3A enggau 2B ke nyengkaum matapelajar Bahasa Inggeris enggau Matematik mesti Gred A.
Pengawa nyain sempekat nya kemari dikemataka Menteri Muda ba Opis Kepala Menteri (Pengatur Pemansang Teknikal Pelajar) Datu Len Talif Salleh sereta digulu pemesai ke bukai nyengkaum Menteri Muda Pemansang Industri (Pemansang Industri Kebun Mit) Datuk Peter Nansian, Direktor Yayasan Sarawak Mohamad Abu Bakar Marzuki.