Nitihka pansik, raban ke biak nadai tentu ngembuan pengerindu macha: Raslin

0

KUCHING: Ulah ngemeranka pengawa macha ba raban bansa kitai pengudah tembu besekula enggau belajar di universiti mengkang kurang.

Ketuai Direktor Perpustakaan Negara, Dato’ Raslin Abu Bakar madahka, pansik ti dipejalaika sida iya nunjukka raban ke biak nadai tentu bepengerindu macha.

“Endang nyauka semua raban bansa di Malaysia ulih macha tang enda mayuh ke ngemeranka pengawa macha.

“Selalu iya enti udah tembu sekula tauka belajar ba renggat universiti, tu (macha) enda dikemeranka agi,” ku iya lebuh bejaku ba pengawa bejadika ‘Perpustakaan Desa’ (PD) Kampung Sungai Bedil Besar ditu, kemari.

Pengerami nya dipenyadika Sapit Menteri Sains, Teknologi enggau Inovasyen ti mega Kaban Parlimen Petra Jaya Datuk Fadillah Yusof.

Raslin madahka, ulah deka macha patut majak dikemeranka raban bansa kena nukuka terus bulih penemu.

Ku iya bejaku baru, enda macha ketegal nadai perpustakaan ba endur kitai lebih agi di menua pesisir, nya enda patut nyadi ke penanggul.

“Kebuah pia, laban perintah udah numbuhka 1,121 PD di serata menua enggau 207 PD di Sarawak.

“Tu pengeran perintah deka nuku ke pengawa macha terus dikemeranka tiap raban bansa,” ku iya.

Kelimpah ari nya, Pengerusi Lembaga Pengurusan Pustaka Negeri, Tan Sri Datuk Amar Hamid Bugo madahka, macha amat beguna dikena nambahka penemu.

“Rugi enti kitai enda ngemeranka pengawa macha laban perintah diatu nyendiaka mayuh perengka guna,” ku iya.