Tuesday, December 7

250 penyereta ngulu program ngisi pengawa puang di Limbang

0
BESAUP NGEMANSANGKA REBAK BARU: Hasbi (tujuh kiba, mua) enggau bala komiti pengatur ke bukai.

BESAUP NGEMANSANGKA REBAK BARU: Hasbi (tujuh kiba, mua) enggau bala komiti pengatur ke bukai.

LIMBANG: Sarakup Dayak Iban Sarawak (SADIA) pampang Limbang mujur ngatur ‘Taklimat Kerjaya’ begulai enggau Suruhanjaya Perkhidmatan Awam (SPA) ba Dewan Suarah Limbang, empai lama tu tadi.

Pengawa tu dipenyadika Kaban Parlimen Limbang Hasbi Habibollah lalu digulu lebih 250 penyereta.

Ba jaku iya, Hasbi madahka berengkah 17 taun ari diatu, penemu enggau pengelandik rebak baru beguna bendar dikena nyungkak pemansang menua.

“Pemansang Sarawak ba taun 2030 bepanggai bendar ba rebak diatu.

“Nya alai, program baka tu ulih mantu nembiak ngulihka pengawa ti seririh enggau peminta menua lebih agi ba Projek Kuasa Tau Dikena Baru Sarawak (SCORE),” ku iya.

Berebak enggau tu mega Hasbi muji SADIA pampang Limbang laban udah bebendar mantu bejadika pengawa baka sehari nya.

“Sarakup tu seririh enggau tuju sida deka mantu nembiak lebih agi baka Dayak ngisi pom minta pengawa ngena ‘on-line’.

“Tu sebengkah ari chara ke engkeman mantu nembiak napi ubah menua ti nyeraka nembiak ngisi pengawa puang,” ku iya madahka baru.

Bela bisi datai maya tu iya nya Chairman SADIA pampang Limbang Kr Jerry Saraie, Sekreteri SPA Sarawak Mohd Saiful Sungkih Abdullah enggau bala bukai.

Raban nembiak ke bisi datai maya tu mega diterang enggau pengawa puang ba opis perintah sereta chara-chara maya ngulu interbiu.