Tuesday, December 7

Aku nadai utai dikesebut, ku Masing

0

KUCHING: Presiden Parti Rayat Sarawak (PRS) Tan Sri Dr James Jemut Masing enggai meri komen bekaul enggau juluk ati Larry Sng ti deka bediri ba sitak Parlimen Lubok Antu ba Pengawa Bepilih Besai Ke-13 (PRU13) tu.

Larry ke nyadi Presiden Parti Pekereja Sarawak (SWP) madahka diri bediri ba penuduk ke diagih ngagai PRS nya nyatup William Nyalau Badak.

“I have no comment on that little boy (Aku nadai utai dikesebut bekaul enggau nembiak rebak baru tu),” ku iya nengah sistem pesan jaku pandak (SMS) ngagai Utusan Borneo, kemari.

Kelimpah ari Lubok Antu, lima agi penuduk diagihka ngagai PRS baka Hulu Rajang, Kanowit, Julau, Sri Aman, enggau Selangau.

Masing ke mega Menteri Pemansang Tanah taja pia, madah injin pengawa bepilih parti udah nyikap diri kena ngetanka kesemua penuduk parti.

Tandu iya, semua nama chalun ke deka bediri udah ba iya tang enggai nerang enggau silik sapa bagi sida.

“PRS diatu udah nyikap diri. Injin pengawa bepilih kami ke dikena maya taun 2011 suba, deka digerak baru lalu kami udah bisi nama chalun ke deka bediri ngarika parti ila,” ku iya.

Sebedau Pengawa Bepilih Nengeri (PRN) Ke-10 ba taun 2011, Larry maya nya Kaban Kunsil Nengeri (ADUN) Pelagus ditingkil ari PRS laban enda sepenmu enggau Masing, udah nya enda dipilih nyadi chalun ngetanka penuduk nya ngarika Barisan Nasional (BN) maya pengawa bepilih nya.

Penuduk DUN Pelagus diatu dipegai George Lagong ke nyadi Sapit Presiden SWP.

Bisi sekeda raban madahka penumbuh SWP kena ‘malas dendam’ ngagai PRS lebuh iya ngengkahka chalun ba enam penuduk nya, tang iya dikenggaika Larry sebedau tu nengah penerang ti madahka SWP deka meri servis ke manah ngagai rayat kelebih agi ba keenam-enam sitak nya.

SWP bisi ngerejister urung 9,000 kaban ba Lubok Antu tang penyampau pengundi urung 21,000 iku.

Parti ke baru ditumbuhka nya mega udah nyerenih bagi chalun ke bediri ba enam penuduk Parlimen enggi PRS; George deka bediri ba Hulu Rajang lalu ADUN Meluan Wong Judat disabung ba Parlimen Julau.