Kompeni di S’wak dipinta chakah mantu perintah

0

KUCHING: Kompeni di menua tu dipinta chakah sereta diperansang bekerejasama enggau perintah Sarawak meri tauka nyendiaka kereban pengerara api ba rumah-rumah panjai di Sarawak, sekalika  nengah “Outreach Programme’ tauka aktiviti tanggungpengawa rama (CSR) kompeni nya.

Ketuai Direktor, Opis Bomba & Pengelikun Malaysia (JBPM) Dato Wan Mohd Nor Ibrahim madahka, nya berindik ari agi mayuh rumah panjai di Sarawak bedau bisi kereban pengerara api.

“Aku nemu agi mayuh rumah panjai di nengeri tu ke bedau diberi kereban pengerara api, kami (JBPM) mega bisi program kediri iya nya dibaruh program pengelikun angus. Tiap taun kami meri kereban pengerara api ngagai 100 bengkah rumah panjai.

“Nya kebuah kitai minta sereta meransang mayuh agi kompeni di menua tu bejalaika ‘Outreach Programme’ tauka terus meri kereban nya ngagai rumah panjai di Sarawak ti mega nyadi sebengkah CSR sida (kompeni), kelimpah ari ti semina ngarapka bantu ari perintah,” ku iya.

Mohd Nor mansutka pekara nya dalam aum pengarang berita, pengudah ti ngulu sereta nyuaka ‘Pingat Kebesaran Jabatan & Anugerah Perkhidmatan Cemerlang 2012’ ngagai 109 iku raban JBPM Nengeri Sarawak, ti diatur ba Dewan Majlis Islam ditu, kemari.

Nitihku iya, ba taun 2012 bisi 115 buah rumah panjai di Sarawak diberi kereban pengerara api, lalu pengawa meri kereban tu deka dikerembai ngagai rumah panjai bukai ke bedau nerima.

Kelimpah ari nya Nor seharitu mega diberi basa nyuaka kereban pengerara api ngagai rumah panjai di kandang menua Lundu.

Kereban nya diberi sebengkah kompeni ti ngeluarka kereban pengerara api di Kuala Lumpur.

“Tu pemun sida (kompeni) meri ngagai rumah panjai di Sarawak, jemah ila kitai melabaka kompeni tu deka mantu ngena chara ke sama,” ku iya.

Nyempulang Nor dalam aum pengarang berita kemari, Direktor JPBMNS  Nor Hisham Mohammad.