Pekit Kumang legit pengerami Makai Lemai Gawai 2013 Kuching

0

KUCHING: Pekit Kumang Gawai deka nyadi pengawa ti dianti maya pengerami Makai Lemai Gawai 2013 ti diatur Komiti Rana enggau Pengintu Pengelantang Tuai Raban Bansa Iban Pelilih Kuching nyerumba 50 taun Sarawak merdeka dalam Malaysia.

Chairman Pengatur Pengerami Temenggung Datuk James Jimbun Pungga madah, pekit nya dibuka ngagai semua peranak Iban ke beumur antara 18 ngagai 25 taun di serata nengeri.

Ku iya, pemenang Kumang Gawai 2013 deka nerima perais mata duit RM3,000, lumur dua RM2,500 lalu penuduk lumur tiga nerima RM1,500. Ketetiga pemenang mega deka nerima sekeda perais bukai kelimpah setipikit.

Semua 15 iku finalis mega deka nerima RM200 enggau perais bukai sereta setipikit, ku Jimbun ba sebengkah aum pengarang berita ditu, pagi kemari.

Makai Lemai Gawai 2013 ti diatur kena 11 Mei 2013 deka ngangauka temuai ti pemadu dipebasa Datuk Patinggi Tan Sri Dr Alfred Jabu enggau bini iya Datin Seri Empiang Jabu kelimpah ti digulu menteri kabinet bukai.

Pengerami nya deka diatur ba Palan Ekuminikal Kristian.

“Makai Lemai Gawai 2013 mandangka komuniti Iban angkun begulai enggau bansa bukai ngintu 50 taun Sarawak merdeka dalam Malaysia.

“Maya perambu numbuhka Malaysia ba taun 1962, tuai raban bansa Iban megai tanggungpengawa ti besai netapka pemutus ngarika semua bansa kelebih agi Iban, setuju nyereta Sabah, Singapura enggau Malaya lalu numbuhka Malaysia,”ku Jimbun.

Nungkatka rambai jaku Segulai Sejalai Ngetanka Adat enggau Pendiau Iban pengerami malam nya deka ngelalau semua bansa Iban ke diau di mengeri sereta pia mega ke agi di diau di rumah panjai ngambika semampai ngenanka adat enggau pendiau Iban.

Pengerami ti nerima sukung ari Serakup Indu Dayak Sarawak (SIDS) mega ngangauka dua iku penanyi tebilang Iban Melissa Francis enggau Ningkan Norman.

Pom masuk Pekit Kumang tau diambi ba Ringkat 6, Bangunan Tun Jugah, Jalai Tunku Abdul Rahman tauka telefon ngagai Pollin Arah nengah lumur 013-5714964 tauka 082-234151.

Pom mega tau diambi ari indu opis Serakup Indu Dayak Sarawak (SIDS) di Jalai Wan Alwi tauka telefon ngagai Shirley Limban nengah lumur 013-8084844 tauka 082-454525 tauka Penghulu Philip Entawan (016-8654931) enggau Tuai Rumah Spencer Birai (010-8230433).

Ambis laun nganjung pom 19 April 2013 lalu disempulang enggau gambar sepemesai paspot sereta bayar masuk RM50.00.

Nitihka penerang ari TR Spencer Birai, tikit mija dikena enggau ngulu pengerami nya bisi dijual nengah rega RM1,000 (premium) sereta RM400 ke alai sebarang tanya tau ditujuka ngagai Penghulu Sidu John nengah lumur 013-8208461/019-8598488.

Bela datai Chairman Komiti Sosial dan Kebajikan Ketua Masyarakat Kaum Iban Pelilih Kuching Pemancha John Tambi, Sekretari SIDS Datin Senorita Linang sereta raban komiti pengerami Makai Lemai Gawai 2013.