SRI AMAN: Semua tuai raban bansa kelebih agi tuai rumah di pelilih menua tu dipinta sama mai nembiak redak dibaruh jaga sida terus nyukung perintah, ku Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis.
Ku iya,semua tuai rumah ngembuan tanggungpengawa mai peranak di baruh jaga sida nyukung perintah tang ukai ngerachun runding sida ngenggaika perintah.
“Kita ke mangku pengawa nyadi tuai rumah nya orang ke sempil enggau rayat di kandang endur kita lalu kita nya meh pengari rayat di baruh pegai kita,” ku iya.
Iya ke mega nyadi ADUN Simanggang bejaku munyi nya lebuh ke bejadika ‘Program Penghayatan 1 Malaysia Peringkat Komuniti’ diatur Opis Pemadah Malaysia Pelilih Sri Aman enggau kerejasama Komuniti 1 Malaysia Kampung Munggu Demam di Rumah Romeo Serit Menggung, Batu Lintang semak ditu pagi kemari.
Ku iya, perintah BN udah lama merintah di menua tu lalu udah mai pemansang ke rayat.
“Keba nya, nadai kedalih rayat ngiarka pemansang perintah BN laban perintah BN betuaika Menteri Besai Datuk Seri Najib Tun Razak di tikas perintah besai enggau Kepala Menteri Pehin Sri Abdul Taib Mahmud di tikas nengeri udah mujur ngemansang menua tu,” ku iya.
Tandu Harden, semua pemansang ke dipeda kitai diatu baka jalai alun, elekterik, bekal ai beresi enggau ke bukai nya datai ari perintah BN ukai ari penyakal.
Ukai nya aja, ku iya, mayuh pemansang tanah udah dibuka di kandang menua Sri Aman nyengkaum Sekim Betanam Kelapa Sawit, Getah enggau ke bukai.
Bisi datai ba pengerami nya, penyandang penuduk Parlimen Sri Aman Masir Kujat, Pemesai Opis Pemadah Sri Aman Fachrio Ferdiansyah Abdillah, Pemesai Opis Pekara Khas (JASA) Sarawak Pelilih Sri Aman Whelthon Lumpoi, Pemantu Khas Masir Edmund Pirang, tuai-tuai opis perintah sereta tuai-tuai raban bansa ke bukai.