Raban nembiak patut chakah nyikap diri, ku Mauh

0

Enda milih dini endur, pemujur pengidup bepanggai ba penemu sereta pengelandik

SELANGAU: Nembiak rebak baru diperansang nyikap diri ngena pemandai sereta pengelandik ke patut enti deka mujur dalam pengidup jemah ila.

MAUH

Kaban Kunsil Nengeri (ADUN) Tamin Joseph Mauh Ikeh madah, pekara tu beguna amat ngambika sida nyendiaka diri enggau chukup napi pemar sereta besemekih ba dunya  ke nadai adan.

“Semua pemandai ke patut tu ukai semina bekaul enggau akademik, tang mega nyengkaum pengelandik teknikal ke majak diguna lebuh gawa.

“Baka ke ditemu kitai, pemandai meh kunchi pemujur dalam pengidup enda ngira dini endur kitai diau sekalika ba menua pesisir tauka ba kandang mengeri,” ku iya.

Ku iya nandu, nyikap diri ngena pemandai sereta pengelandik beguna amat sereta nyadi ke ubah ba nembiak rebak baru napi pemansang.

“Kita patut semampai muka runding, nampai jauh sereta anang sesekali ngenggaika pemansang dipejalaika perintah dikena nyungkak tikas pengidup rayat.

“Kita ukai semina besemekih enggau pangan diri aja, tang mega besemekih enggau serata dunya”ku iya.

“Nya alai, anang tinggal ba pengawa ngulihka pemandai ke patut diguna,” ku iya bejaku ngarika Sapit Menteri Pemansang Menua Pesisir Enggau Pelilih Menua, ke mega Kaban Parlimen Selangau Datuk Joseph Entulu Belaun bejadika Astro Fiesta Mesra Belia 1Malaysia Tikas Parlimen Selangau ba SK Batu 36, ditu malam hari Enam nyin tadi.

Mauh mega ngelalau peranak menua pesisir kelebih agi ba Parlimen Selangau ngambika sida enda mudah teparuk runding ningaka petenah raban orang ke jai runding.

“Perintah Barisan Nasional(BN)sebuah perintah ke seruran mentas enggau perengkaguna sereta penanggul ke ditapi rayat, enda ngira bansa enggau jalai pengarap.

“Perintah BN mega udah mai mayuh bengkah pemansang ti nguntung genap serak rayat. Nya alai, beri meh sukung ke penuh ngagai perintah BN ngambika ulih bejalaika pemansang belama,” ku iya.

Program Astro Fiesta Mesra Belia 1Malaysia Tikas Parlimen Selangau udah diatur kena 6 nyentuk ke 7 April tu tadi. Mayuh bengkah main bisi dipejalaika baka pemandang sereta bejual, pekit nyumai enggau karaoke.

Program nya mega dirami enggau seraban artis baka Man Bai, Stevenson, Hailey enggau raban pemuzik Masterpiece.