UGGAH
KUCHING: Tiga pekara nyangka deka di bantaika penyakal maya kimpin ba Pengawa Bepilih Besai ti Ke-13 (PRU13) seraya minta dikesinuka rayat, iya nya pekara jalai pengarap, bansa enggau tanah.
Menteri Pengeraja Asal enggau Rampa Menua Dato Sri Douglas Uggah Embas madah ketetiga pekara nya ukai pekara ke baru dalam randau penyakal, ke sigi udah lama nyadi senyata sida.
“Nya ukai pekara baru ke deka dibantai penyakal, tambah mega penyakal enda ulih dikearapka,” ku iya.
Iya madah baka tu lebuh dikerandau pemberita pengudah bejadika atur pengawa nyuaka chek RM400,000 ngagai Gerija Parish All Saints Tabuan Dayak ditu, ensanus, ke bela digulu Sapit Menteri Kereja Raya Datuk Yong Khoon Seng ti mega penyandang sitak parlimen Stampin.
Uggah ti mega penyandang sitak parlimen Betong madah, Perintah Barisan Nasional (BN) deka terus nerang ngagai rayat, ba semua pekara ke deka ditemu sida ari Perintah lalu ngaga mayuh agi program dikena mutarka isu baka tu, lalu tu mega nyengkaum nerang ngagai rayat bekaul enggau berita ke ditabur nengah ‘Radio Free Sarawak’.
“Perintah BN mega deka nyendiaka kaunter macham teknologi media enggau ‘online’ ke bejaika perintah BN.
“BN sedia betapi enggau ‘perang pengawa rama enggau siber’ enggau chara kami empu madah ngagai mensia mayuh iya nya BN patut diberi peluang megai menua baru dalam kandang lima taun tu ila,” ku iya.