ARAPKA BN MUJUR: Masing betabi jari enggau Chairman Barisan Nasional Nengeri Pehin Sri Abdul Taib Mahmud sepengudah tembu pengawa mantaika rintai nama chalun kemari.
Lima penyandang ke bukai dikearap ngetanka penuduk diri empu
KUCHING: Kepala Menteri Pehin Sri Abdul Taib Mahmud mantaika rintai penuh nama chalun Barisan Nasional (BN) ba pengawa bepilih besai ke-13 (PRU13) kemari.
Presiden Parti Rayat Sarawak (PRS) Tan Sri James Jemut Masing pechaya semua rintai enam chalun ke bediri ngarika parti nya deka teulihka pemujur.
Dalam rintai nama nya, seiku chalun baru disabung PRS lalu nya ungkup Parlimen P.216 Hulu Rajang.
Ba PRU13 tu, Hulu Rajang deka diarika Wilson Ugak Kumbong nganti penyandang Datuk Billy Abit Joo.
“Kitai pechaya ulih ngetanka penuduk Hulu Rajang ketegal chalun baru nya udah lama bepolitik di menua nya.
“Lebih 20 taun iya udah mantu BN di Hulu Rajang, kelimpah ari iya ke nyadi Sekretari Politik Kepala Menteri sereta nyadi sekretari aku…Wilson chukup peneleba di Hulu Rajang,” ku Masing lebuh dikerandau pemberita kemari.
Nyaut tanya sekalika penyandang penuduk nya Datuk Billy deka bediri ngelaban Wilson, Masing nyaut: “Aku pechaya Billy udah besai runding dalam politik. Iya deka datai lalu mantu Wilson”.
Nyadi diatu, tanggungpengawa kitai (PRS) sereta mega Billy matak penyukung iya datai meri saup lalu nyukung BN ke diarika Wilson, tandu Masing.
Ngenang senentang pengeran seiku orang dagang ke udah lama dalam pengawa politik, Donald Lawan ke udah netapka diri bediri di parlimen Sri Aman, Masing minta iya (Lawan) berunding panjai lalu matak diri ari bediri.
“Aku arap pemutus lawan ti deka bediri ngelaban PRS di Sri Aman enda ngeruga pemaik nama anak iya ke nyadi Kaban Kunsil Nengeri (ADUN) Balai Ringin ke mega raban dalam PRS.
“Arapka apai ADUN Balai Ringin tu berunding panjai…anak iya agi biak lalu agi jauh pejalai. Pekara ke diperambu kitai diatu, ungkup pemaik jemah ila…semua nya ungkup raban nembiak ke diatu.
“Arapka Lawan enda bediri,” ku Masing.
Dalam rintai nama ke dibantaika Taib kemari, PRS ti bediri ba enam penuduk parlimen deka nyabung Masir Kujat di Sri Aman, William Nyalau Badak di Lubok Antu, Datuk Joseph Salang Gandum di Julau, Datuk Aaron Ago Anak Dagang di Kanowit, Datuk Joseph Entulu Belaun di Selangau sereta Wilson Ugak Kumbong di Hulu Rajang.
Komiti Pengawa Bepilih (SPR) udah netapka 20 April 2013 nyadi hari nganjung nama chalun bediri lalu 5 Mei 2013 ditetapka nyadi hari muai undi.