ENDA TINGGAL: Seiku Ranger Iban nerima midul PJM.
KUCHING: Raban soldadu di serata menua Malaysia lebih agi sida ke nguan Sarawak dilalau nyukung Barisan Nasional (BN) berindik ari pemanah perintah tu ke udah mayuh mai pemansang sereta ubah ngangkatka pengelantang pengidup pendiau sida.
Menteri Ngetan Menua Dato’ Seri (Dr) Ahmad Zahid Hamidi madah, undi soldadu berat ukai semina ke rayat Malaysia tang ari raban soldadu Malaysia (ATM).
“Kitai nemu Menteri Besai (PM) Datuk Seri Najib Tun Razak kala mangku pengawa nyadi Menteri Ngetan Menua kandang 14 taun.
“Maya nya mayauh bendar pemansang sereta pengelantang pendiau soldadu udah dikemanah. Lalu diatu aku ke megai tanggungpengawa nya, deka terus nyambung pemanah pengawa iya,” ku iya lalu nambah Perintah Malaysia betatika pengelantang pediau soldadu enggau sida sebilik.
Iya madah baka tu ba atur pengawa betemu enggau raban soldadu Malaysia (ATM) sereta nyuaka midul PJM ngagai ex-soldadu enggau rangers sitak Kuching di Dewan Bukavu di Kem Penrissen kena Hari Satu tu tadi.
Ku Ahmad Zahid, lebuh meri pemadah meri PFI ke Kem Penrissen enggau sekeda program bukai ke kala di padah iya suba, ngayanka PM betatika pengelantang pendiau soldadu lebih agi dalam Bajet ke taun tu, soldadu deka diberi elawin khas RM200 ke udah di putarka.
“Ukai semina nya aja, insuran beraban mega diberi tang ke berat sekali, gaji digaga sebaka enggau pengereja pengawa perintah bukai baka ke kala dipadahka PM sebedau tu.
“Aku deka minta ngagai PM, iya nya nitihka undang-undang gaji ATM diatu enda tau enda tinggi ari servis bukai.
“Nya udah dirikut dalam genteran tusun ukum…Kitai enda minta lebih ari nya, aku besemaya deka mansik baru gaji enggau sekim servis ATM,” ku iya.
Iya madah, pekara ke udah digaga nyadi bukti iya nya pemun singkang, sida ke nyadi mayar nyadi kaban ‘Lembaga Tabung Angkatan tentera’ (LTAT) diberi dividen 18 persin ulih LTAT.
“Lalu pia mega raban soldadu ke nyadi kaban Koperasi Angkatan Tentera (KAT) deka diberi dividen ke besai, ke deka dipadah penyampau nya ila,” ku iya.
Iya mega madahka ukai semina meri dividen ke besai ngagai (pencarum) LTAT enggau koperasi, tang raban soldadu ke deka pinchin, disediaka ‘profiling’ 3 taun sebedau sida pinchin.
“Kami deka beratika ni bengkah pengawa kedua tauka ke deka dipasuk raban soldadu ke deka pinchin tu enti sema pinchin ila, iya nya sida iya deka ngereja pengawa dagang tauka milih pengawa diri empu,” ku iya lalu nambah, ninting taun urung 3,000 pengawa bisi disedia ungkup ATM ke pinchin.
Iya madah, kebuah nyendiaka pengawa ke raban soldadu ke udah pinchin, laban enggaika komuniti ngemaruhka soldadu ke udah pinchin ke semina diambi gawa nyadi deriba teksi tauka jaga.
“Maya Najib nyadi PM sereta aku empu nyadi Menteri Ngetan Menua, aku deka terus ngangkatka pemanah sereta pengelantang pengidup raban soldadu ke udah pinchin.
“Dini menua dalam dunya tu ke kala meri soldadu ke enda pinchin bayar ‘one-off’ baka kitai? Nadai…Ke ditemu aku, di menua bukai enti soldadu nya enda pinchin, enda pinchin meh nya, enti pinchin, pinchin meh nya,” ku iya lalu madahka di Malaysia, soldadu diatu enti pinchin, pinchin sida iya di tiki 2 persin setaun, nya nadai di menua bukai.
Iya madah bayar ‘one off’ RM1,000 diberi ngagai soldadu ke enda bepinchin ngambika iya ngayanka tanda terima kasih ngagai soldadu laban udah mayuh endar berambunka nyawa ke menua.
“Sepital ATM bisi wad enggau farmasi ungkup sida veteran…Di menua USA enti deka berubat semina diberi ngagai veteran soldadu ke sakit sida iya bisi bekaul enggau pengawa lebuh agi gawa nyadi soldadu tauka bakal dalam perang, nya aja ke ulih diubat.
“Enti kena darah tinggi, kemi manis, pedis punggung nadai masuk lis tang kitai di menua tu, soldadu ke bisi pemedis nya diperubat magang.
“Tu gaya Perintah ke patut di ukung kitai…Anang nyadi lima iku jeneral ke enda ingatka pemanah perintah (lima iku jeneral ke enggau bediri maya PRU 13 tu di semenanjung). Maya nyadi Panglima soldadu enda kala mai ubah, lebuh bekimpin di luar diatu madahka utai tu enda betul, utai nya enda betul lalu ngelaban Perintah,” ku iya.
Ahmad Zahid nambah baru, soldadu maya gawa tauka udah pinchin patut talukka Raja enggau Menua.
“Ungkup kitai pengundi, ni bagi Perintah ke dipilih? Anang milih perintah ke semina landik besamaya, bejaku bula. Peda sida ke megai perintah di Pulau Pinang, Kedah, Kelantan, Perak (naka 11 bulan aja), enggau Selangor, semua enda ngamatka semaya sida.
“Pilih Perintah ke ulih ngetanka nasit kita (soldadu) iya nya Perintah BN baka ke diatu di Sarawak sereta ba renggat Perintah Besai. Nadai perintah bukai….Endang udah tampak endar kitai untung laban PM enggau Perintah betatika nasit soldadu,” ku iya.
Kena 30 April tu ila, raban pengelikun menua baka soldadu enggau polis deka ngundi tumu.
“Raban pengelikun antara pengundi tumu iya nya 30 April…5 Mei peti undi deka dibuka. Lebuh peti undi dibuka lalu 100 persin nya ngundi Perintah, aku besemaya ke Kem Penrissen tu enggau endur bukai alai undi soldadu, semua janji nya deka digaga enggau jampat.
“Kitai deka meri perais pemujur tu ngagai PM, aku besemaya deka mai PM ngagai Sarawak dalam kandang 100 hari udah PM mujur nyambung pengawa iya betemu enggau kita,” ku iya.
Sama bisi ngulu atur pengawa nya kemari, chalun Stampin (BN-SUPP) Datuk Yong Khoon Seng, chalun Kota Samarahan (BN-PBB) Rubiah Wang, Menteri Langgur Pemansang Kedua enggau Pengintu Penatai Pemisi Datuk Amar Awang Tengah Ali Hasan, Menteri Muda Nembiak (Nengeri) Abdul Karim Rahman Hamzah, enggau Datuk Pahlawan Panglima Tentera Briged Datuk Redzuan Baharuddin.