KUCHING: Stesyen radio ngatika diri, iya nya Radio Free Sarawak (RFS) dikumbai sebuah stesyen radio ke mayuh udah mantu penyakal dalam kimpin pengawa bepilih.
RFS tu iya nya sebuah stesyen radio ke ditumbuh ulih pemberira Clare Rewcastle Brown lalu dibantu ex-DJ radio CATs FM Peter John Jaban ke tebilang agi enggau nama iya Papa Orang Utan, Christina Suntai ke udah ngabiska pelajar iya ari Kolej Teknikal, Florida, US dalam pekara Program Komputer enggau Sains Komputer enggau Michael Ngau.
RFS berengkah nabur berita sida iya kena 16Nov 2010, lalu tabur radio tu ulih di dinga ke belabuh naburka berita sida iya ari pukul 7-9 lemai.
Mandal chairman parti Pakatan Keadilan Rakyat (PKR) menua, See Chee How madahka RFS tu lain ari stesyen radio bukai laban berita ke ditabur stesyen nya enda diserenih lalu ngujungka rayat ke diau di menua pesisir ngulihka penemu ba utai ke nyadi ngelingi sida iya.
“RFS tu stesyen radio ke tau alai peninga radio mantaika sada tauka utai ke enda ngelantangka ati sida iya.
“Nyangka bisi mega chara RFS tu mantu kami dalam kimpin kami, enggau riput ke sama timbang ke ulih di dinga ulih peninga radio di menua pesisir,” ku iya.
See, ti mega Kaban Kunsil Nengeri (ADUN) Batu Lintang madah, RFS enda sebaka enggau stesyen radio bukai laban stesyen radio bukai bisi utai ke tau digaga, bisi sekeda enda tau laban dikemata perintah.
Tang taja pia, iya madah PKR enda semina bepanggai ba RFS aja tang chalun-chalun ke udah di pilih patut bebendar agi gawa ngulihka sukung ari pengundi.
Ba pengawa bepilih parlimen ke-13 (PRU 13) tu ila, PKR seiku ari gempung Pakatan Rakyat (PR) deka bediri betangkup enggau BN di 15 kerusi, lalu iya mega antara kerusi PR ke pengabis mayuh ke deka bediri tu ila.