KUCHING: Mayuh macham chara dikereja bala chalun dikena ngulihka pemujur (menang) dalam pengawa bepilih tu lalu bisi sekeda nya nguna perang -psikologi nyengkaum minta berekat ari petara besenipak enggau pengarap ku ati diri.
Ungkup raban bansa Iban bisi nya miring ke alai sida minta tulung ari petara ngambika ulih menang.
Tang pekara ke nyelai nya pengawa miring enda semina dikereja orang ke agi megai pengarap lama tang mega orang ke ngumbai diri megai pengarap Kristian.
Ba raban bansa bukai sida mega enda tinggal ari minta tulung ngambika bulih pemujur dalam pengawa bepilih senipak enggau pengarap diri.
Taja pia, ku penemu seiku tuai Pengarap Kristian ke enggai madah nama diri, Tuhan enda maruk diri dalam pengawa bepilih lalu enda mega deka malut orang mayuh ba senentang sapa ke aruh dipiih.
“Kitai meda lebuh Tuhan nempa mensia Iya mega meri kitai pemintar antara ni bagi ke manah enggau ke jai, betul enggau ke salah. Keba nya mega dalam pengawa bepilih tu alai Tuhan ngasuh kitai ngena pemintar kitai ngaga pilih diri.
“Tuhan enda mejal kitai taluk ke Iya. Enda mega Iya ngakim mensia diatu tang Iya meri awak ngagai semua orang nya ngesalka penyalah diri datai ngagai maya pengujung dunya Iya deka ngakim mensia lalu semua deka nyadi orang ke rurus ba mua Iya,” ku iya.
Tandu iya, sebarang pengawa ke digaga chalun tauka parti politik enggau mensia mayuh ngambika bulih tulung ngambika mujur enda deka nyadi.
“Kitai diberi awak milih sapa ke patut megai menua tang ke beguna amat nya kitai aruh pintar ngaga pilih nya,” ku iya.