PENGELALU: Yong dikelaluka peranak menua dia seraya disempulang Tan enggau Lo malam ensana.
KUCHING: Penyandang sitak parlimen Stampin Datuk Yong Khoon Seng ngelalau rayat ngundi Barisan Nasional (BN) ngambika perambu atur pemansang majak ulih dikerembai.
Bejaku ba sebengkah pengerami Ketuai Begulai enggau Rayat P.196 Stampin di Desa Wira Lot malam ensanus, iya nesau semua pengundi ba genturung pendiau nya nurun bebala mayuh, ngundi kenaka 5 Mei nyunting BN.
“Tentuka maya 5 Mei kitai nurun ngundi. Enti penuduk parlimen Stampin dirampas penyakal, kitai deka lenyau semua.
“Perintah BN deka majakka program pemansang ngagai kitai semua enti diberi awak sekali agi numbuhka perintah,” ku iya.
Iya ke mega Sapit Menteri Kerejaraya madah, udah nyata perintah BN ngelamatu mayuh nyendiakka bemacham program bantu ungkup pemaik enggau pengelantang rayat.
“Nengah gaya ekonomi ti manah, perintah udah meri bantu BR1M, baucer Bup 1Malaysia RM200, program Mulaika Diri Ke Sekula RM100 sereta nyendiakka klinik 1Malayisa, Kedai Rayat 1Malaysia.
“BN ngenuluka rayat ngambika sida iya bela ngasai pemansang menua,” ku iya.
Dulu agi ari nya, Pemancha John Tambi ba jaku pengelalu iya ngansak rayat enda ningaka jaku achuk raban penyakal ti bejaika ketuai dalam perintah BN.
Ku iya, penyakal mansutka petenah sengapa bejaika ketuai BN ngambika rayat begedi lalu nyukung penyakal.
“Anang kitai teparuk runding ninga tuduh sengapa ari raban penyakal.
“Pengari kitai, Datuk Yong naka ke udah ditemu semampai deka mai pemansang ngagai kandang endur kitai,”ku iya.
Bela bisi ngulu atur pengawa nya chairman SUPP Batu Kawa Tan Joo Pui, chairman JKKK Desa Wira Lot Anthony Jambuh, chairman Opis Kandang Kunsil Padawan (MPP) Lo Khere Chang sereta orang bukai.