Nansian negapka penemu mantu BN bekimpin tang ukai ba Mas Gading

0

BAU: Kaban Kunsil Nengeri (ADUN) Tasik Biru Datuk Peter Nansian Ngusie nanduka penetap penemu iya deka bekimpin ungkup Barisan Nasional (BN) di sebarang penuduk Parlimen kelimpah di Mas Gading.

Iya bejaku ngagai pengarang berita ba sebengkah program ke diatur ba Dewan Suarah Bau kemari ti madahka diri bisi mantu kimpin ungkup BN di  Petra Jaya, Stampin enggau Baram enggau sekeda sitak ke bukai tu ila kelimpah ari Mas Gading.

Nansian, ke lalu nyadi Menteri Muda Pemansang Industri, nanduka penetap penemu iya nya bekaul Parlimen Mas Gading.

“Aku agi mengkang ba penetap penemu enda meri sebarang komen sereta bekimpin di Mas Gading. Ketegal bisi pekara bebalut nyadi di Mas Gading, manah aku matak diri ,” ku Nansian.

“Pengawa Bepilih (kimpin) enda lama, tang enti aku maruk diri ditu (Mas Gading), aku nya nempa pekara ke tau ngujungka rayat ditu pechah ke beserunyut. Keba nya, beguna bendar nudukka penyerakup ari peneka ati ku empu. Orang ketuai baka aku aruh negapka penyerakup orang ke di baruh pegai kitai.”

Lebuh ke ditanya sekalika iya deka meda BN menang di Mas Gading dalam Pengawa Bepilih Ke-13, ku timbal Nansian: “Aku nadai komen bekaul pekara ba Mas Gading. Enti aku meri komen, reti nya aku orang ke nadai ngembuan penetap penemu.”

Nansian udah kena pejal sekeda piak ngambika mantaika penetap iya ba   Mas Gading lebuh seiku kaban G5, Datuk Dr Tiki Lafe, berunding bediri Ngatika Diri lebuh BN enda ngambi iya nyadi chalun ngetanka penuduk.

Parti Demokratik Progresif Sarawak (SPDP) ningkilka lima iku pengari sida ke udah nya numbuhka G5. Kelimpah ari Nansian enggau Dr Tiki, sida ke bukai nya Datuk Sylvester Entrie Muran (Marudi), Rosey Yunus (Bekenu) enggau  Paulus Palu Gumbang (Batu Danau).

Sitak Mas Gading diperebut Dr Tiki, Anthony Nogeh Gumbek (BN), Mordi Bimol (DAP) enggau Patrick Anek Uren (STAR).