Pegung nyemerai RM14 juta deka digaga ba Bau

0

BAU: Sebengkah kompleks pegung nyemerai bekualiti tinggi ti beungkus RM14 juta deka digaga di Bau dibaruh Lumpar Pemansang Malaysia Ke -11 (RMK 11) (2016 – 2020).

Menteri Pemansang Rama, Tan Sri William Mawan Ikom madahka, kompleks nya dibuka di Bau dikena ngelai pemujur Ratu Terejun Menua Pandelela Rinong ti peranak asal menua nya, dalam bidang terejun.

Iya madahka opis menteri mega deka muka kompleks ke sebaka di Betong kelimpah di Mas Gading, Bau ngambika ulih mantu menua nempa mayuh agi orang ti bepengelandik dalam bidang terejun.

“Opis menteri aku bisi perambu deka ngaga kompleks pegung nyemerai bekualiti tinggi, ngerimbai stadium ditu (Bau).

Kompleks baru tu ke dipelaba ngena ungkus belanja RM14 juta deka digaga dalam RMK 11,” ku iya.

Mawan bejaku dalam aum pengarang berita maya merarau enggau chalun Barisan Nasional (BN-SPDP) Mas Gading, Nogeh Gumbek enggau bala ketuai pampang parti SUPP, PRS, PBB sereta SPDP sitak nya, ke diatur ba Gunung City Restaurant ditu, kemari.

Pandelela maya lumba enggau main Olimpik di London taun 2012 teuliuhka midul engkeraju ba pekit terejun 10meter platform indu.

Pandelela mega atlit indu Malaysia keterubah mai menira maya pengerami pemuka Sukan Olimpik 2012 di London.

Bela bisi datai ngulu pengawa serumpu merarau nya kemari, Nogeh, Pamg (apai Pandelela), Chairman Parti Pesaka Bumiputera Bersatu (PBB) Pampang Tasik Biru John Nyigor, Kepala Pemadah SPDP Tasik Biru Henry Harry Jinep enggau kebukai.