Rega nurun ngenyit nating pengidup pekebun mit getah

0

SARATOK: Pemesai Opis Pemansang Orang Betanam Getah Kebun Mit (RISDA) Pelilih Saratok, Hardenan Haji Golong madah, rega getah ke nurun ngenyit sepenyampau 41.3 persin dalam timpuh 2 taun tu, udah ngenataika penanggul ngagai sekeda pekebun mit ke bepanggai penatai pemisi semina ba komoditi nya berasai kena tating.

Ku iya, berindik ari nya mayuh chara dikena ngurangka penanggul nya, kelebih agi ngagai raban pesereta ke masuk program ke diatur RISDA, piak iya udah bejalaika seiti atur proaktif nengah pengawa meri Bantu Khas.

“Asil ari Aum Kaban Piak Bekuasa RISDA Kali 226 (Khas) kena 19 April 2013 tu tadi, piak RISDA udah ngemendarka atur meri Bantu Khas sepenyampau RM 160 juta ngagai pekebun mit ke patut nerima ketegal rega getah nurun ngena chara sekali bayar.

“Atur meri Bantu Khas tu chara ke jampat kena ngelempungka tating kos sara tupi ketegal rega getah ke udah nurun diatu.

“Bantu Khas tu iya nya sepenyampau RM500 diberi ngagai tetiap pekebun ke patut nerima sereta udah nitihka atur ke udah ditetapka,” ku Hardenan maya nyuaka Bantu Khas RISDA ngagai 50 pesereta RISDA ke bisi masuk dalam program Agropolitan Bukit Sadok (Ulu Awik) RISDA, kemari.

Pengerami nyuaka bantu nya diatur ba Opis RISDA Pampang Saratok lalu bantu nya udah disuaka Sapit Kepala Direktor RISDA Sarawak, Kamarulazizi Mat Zain.

Tandu Hardenan, ukai semua pesereta ke layak nerima Bantu Khas nya, laban sebedau pengawa meri bantu nya dipajalai, piak RISDA deka mansik dulu.

“Antara atur kena nentuka sapa ke layak nerima iya nya aruh peranak Malaysia, ngerejister enggau RISDA, ngembuan tanah sepemesai 2.5 hektar enggau ke baruh, enggau pengempu tanah ke sah maya ngaga peminta.

“Nyentuk ke diatu, dianggarka urung 320,000 iku pekebun mit getah ke berejister enggau RISDA layak nerima Bantu Khas tu.

Nitihka rikut piak RISDA, sepenyampau 401,454 iku pekebun mit udah ngerejister enggau piak RISDA, naka kediatu.

“Bagi nengeri Sarawak, bisi 3,225 iku pekebun mit layak nerima bantu nya ti mungkur agih belanja sepenyampau RM1.6 juta,” ku iya.

Tandu iya, naka kediatu, piak RISDA udah meri bantu nya ngagai sekeda endur baka ba bagi menua Sibu kena 28 April, RISDA Miri kena 30 April 2013 sereta di Betong bedau lama tu tadi.

“Laluh bantu nya deka disua enggau naka pengelengkas sereta diagih nengah RISDA Stesyen dalam awak ke semak tu.

“Kitai arapka bantu tu ulih mantu ngelempungka tating raban pekebun mit getah sereta diguna enggau manah.

“Ungkup raban pekebun mit ke layak tang nama nadai dalam lis, sida tau ngelawa Opis RISDA ke besemak ngambi pom peminta bantu nya,” ku iya.