Seraya ngempuru belanja, pengawa beserumpu nya mega ngenegap kaul

0

KUCHING: Komiti Chapel St. Philip’s ba KM20, Jalai Kuching-Serian diatu benung ngumpul belanja dikena ngemesaika Chapel nya.

Ketegal nya, komiti chapel nya udah ngatur Pengerami Makai Lemai kena 3 Mei tu tadi sereta digulu lebih 500 iku temuai nyengkaum raban Chapel enggau mensia mayuh ba kandang menua nya.

Sama bisi datai ngulu pengerami makai lemai nya Sapit Archbishop Gerija Anglikan Pelilih Asia Tenggara, Right Revd Aries Sumping enggau pengari gerija ke bukai.

Lebuh bejaku, Aries madahka pengerami ke diatur nya ukai semina dikena ngumpul belanja aja tang mega ngempitka kaul bala raban gerija nya.

“Ba pengerami ke baka tu meh kitai begelumu sereta bekelala enggau pangan diri sereta ngenegapka kaul kitai.

“Aku enda bejaku lama tang aku ngarapka pengerami ke diatur tu ulih nyapai juluk sereta nambah belanja dikena ngemesaika Chapel St. Philip’s ngambika muat endur raban jalai pengarap ke majak mayuh,” ku iya.

Kena ngerami malam nya, mensia mayuh ke ngulu pengerami makai lemai nya diperindang ngena Live Band ari Band KBC.

Bala temuai ke benasit mega bisi mai perais pulai ulih ari pengawa nyabut tikit benasit.