Tuesday, December 7

Bup‘When Lightning Strikes,The Return of Panggau Warriors’ dikena mulai pengingat

0

PENULIS PERANAK INDONESIA: Oktavia Rosari Nurtjahja mandangka bup ke ditulis iya.

KUCHING: Pemalat panchar kilat ngayanka pengeringat jelu enggau antu di puak kampung puang seraya dituju kena ngerak sereta nagang mensia beperimbaka batang ngusika Pulau Borneo.

Tu mega ngelaika belabuh perang mensia enggau jelu ba puak kampung di Pulau Borneo, menua ke dipekunsi bejuta mensia enggau jelu sekalika agi idup tauka begulai semengat.

Laban penyampau kayu majak lus di puak kampung ngujungka kampung majak kusi ketegal perimba mensia, bala antu raya, enggau semengat jelu ke nguasa kilat, ngambi pemutus mantup ke runding sida nguji nyelamatka kayu kampung ari pengerangka pengawa mensia ke ngasuh kampung kusi, punas penumbuh sereta pengidup.

Berindik ari renyang pengawa mensia, dia deh bujang berani ari Panggau nurun belaban ngelaban jelu ba tanah enggau di langit.

Taja pan sida bela siru ke pendiau sereta pengelikun di langit, pengudah jeman ngejangka dunya tu, sida iya nadai pilih bukai tang belaban ngetanka menua sereta kereja kena ngidupka diri.

Bup ‘When Lightning Strikes’ keterubah ditulis sereta nusui pasal tusun Pemulai Bujang Berani Panggau tauka ‘The Return of Panggau Warriors’ becherita senentang dunya kampung Pulau Borneo dalam ensera Iban ti ditulis seiku penulis bansa Indonesia, Oktavia Rosari Nurtjahja.

Oktavia keterubah datai di Pulau Borneo dalam taun 2001 laban gawa di Sarawak seraya bekelala enggau orang menua tu sereta ngiga penemu bekaul enggau kampung ke diterutu ujan.

Nyau pengelama Oktavia gawa di Sarawak, iya bekelala enggau Keling Stevenson Ancheh (ari Saribas) ke mega mayuh udah ngajar bini iya, pasal adat Iban, ensera enggau jerita tuai.

Oktavia ke nadai pengawa bukai kelimpah ari gawa di rumah aja, mega dikelala enggau nama Indai Sampurai (ari nama anak tuai iya, Sampurai).

Ipar Oktavia, Phyllis Ancheh, ke gawa di Kuala Lumpur, udah abis macha bup tu madahka semua ensera ke ditulis dalam bup nya, utai ke disagukana Oktavia lalu disalin nyadi ensera, nitihka penemu iya ba ensera lama ke kala didinga iya.

“Bup tu mulaika pengingat lebuh kami kelia, bakani ku ini kami selalu nusui ensera baka  Kumang enggau Keling.

“Tu bup ensera Iban ke manah,ditusun dalam konteks moden tang bisi bekaul enggau penanggul ke ditapi dalam abad ke-21 di Pulau Borneo.

“Aku mega rindu meda ukir gamal Kumang enggau Keling ke selalu dikumbai kitai tak nadai penimpang mimit lalu baka nya mega bekaul enggau adat Iban, pantang tauka ukir tubuh, parang ilang, nyabur lalu nama kebuah dulu bisi sarung sereta ditangkin,” ku Phyllis ke temegah ke bansa diri nyadi Iban.

Bup ‘When Lightning Strikes, The Return of Panggau Warriors’ tau dibeli enggau rega RM39.90 nengah ‘online’ Createspace tauka Amazon.com. Sida ke diau di menua Europe tauka di US ulih meli tauka nginjau nengah Kindle.

Di Sarawak bup tu ulih dibeli nengah Phyllis (Ipar Oktavia) empu enggau chara betelefon nengah lumur 016-8919724.