Semua ADUN enggau MP ari S’wak besemaya nyukung ketuai BN Nengeri sereta Perintah Besai

0

KUCHING: Pengari rayat Sarawak, raban Kaban Kunsil Nengeri (ADUN) enggau Kaban Parlimen (MP) netapka ‘Semaya’ nyukung penuh perintah besai ti betuaika Menteri Besai Datuk Seri Mohamad Najib Tun Abdul Razak sereta perintah menua ke betuaika Kepala Menteri Pehin Sri Abdul Taib Mahmud.

Semua raban tu mantaika ‘Semaya’ di mua Najib ba pengerami Ngintu Hari Gawai 2013 ti diuluka Sapit Kepala Menteri Datuk Patinggi Tan Sri Dr Alfred Jabu ba sebengkah hotel ditu, malam ensanus.

Raban tu mega netapka diri deka bebendar ngenanka penyerakup, pengelikun sereta pemaik politik menua Sarawak lalu deka ngamatka semaya Barisan Nasional (BN) ungkup pemansang rayat.

“Pemujur teulihka 80 persin penuduk ba pengawa bepilih parlimen tu tadi chukup mandangka rayat lebih agi bansa asal di Sarawak nyukung perintah BN.

“Pemutus tu mega nyata mandangka rayat menua pesisir nulak penyakal sereta pechayaka perintah BN ulih mai pemansang,” ku Jabu.

Berindik ari nya, kami ke nyadi pengari rayat baik nya ADUN enggau MP deka bebendar ngiring pemansang menua Sarawak lalu nentuka semua rayat teulihka pengelantang ari atur pemansang ti nyadi, tandu iya.

Jabu nambah, menua Sarawak deka majak mansang jemah nengah iring Najib sereta Taib lalu nyapai juluk menua maju maya manggai ba taun 2020.

“Mayuh menua ke dulu agi merdeka ari kitai bisi udah tumbang ketegal ketuai sida iya enda landik ngatur menua diri maya ke diatu.

“Tang ba Malaysia tauka Sarawak, taja pan gaya ekonomi dunya enda berapa manah, kitai mengkang ulih mansang lalu ekonomi kitai mega mengkang tegap,” ku iya.

Pengerami Gawai 2013 ti nungkatka rambai jaku ‘Segulai Sejalai’ ngundang Najib nyadi temuai ke pemadu dipebasa sereta digulu raban ADUN enggau MP menua Sarawak.