Perintah Johor dikearap meri awak ngagai Jaku Iban dipelajar di sekula menua nya
JOHOR BAHRU: Bahasa Iban tauka Jaku Iban nyangka bisi awak diajar ba menua Johor Bahru, iya nya di genturung pendiau ke mayuh diuan bansa Iban baka di pelilih Menua Pasir Gudang enggau di Johor Bahru empu.
Maya ‘Program Tautan Kasih Bumi Kenyalang’ diatur di Johor Bahru ulih Gerempung Jaku Iban, Universiti Pendidikan Sultan Idris (PERBIB) enggau ‘Jalinan Anak Sarawak UPSI’ betuaika chairman program, ti mega nyadi Ketuai Jabatan Bahasa Moden UPSI Dr Chermaline Osup kediatur ba Dataran GAIU, Megah Ria , Johor kena 7-9 Jun tu tadi.
Chermaline ba jaku iya minta perintah menua nya, beratika Jaku Iban ulih dipelajar nembiak Iban ke diau di pelilih menua nya.
“Aku meri terima kasih ngagai Menteri Besar Johor Datuk Seri Mohamad Khaled Norden, ke udah mantu ngemujurka program enggau sukung iya ba Jaku Iban nyadi seiti ari mata pelajar ke bisi awak diajar di sekula Pelilih Menua Pasir Gudang enggau Johor Bharu, laban beratika komuniti Iban ke mayuh di kededua pelilih menua nya,” ku iya.
Berindik ari nya, Kaban Parlimen Pasir Gudang, Normala Abdul Samad lebuh bejadika atur pengawa nya ngarika Khaled, besemaya deka mantu mai pekara nya ngagai renggat ke tinggi agi, kena ngamatka pengawa ngajar Jaku Iban di sekula sekondari di Pasir Gudang enggau Johor Bharu ulih digaga.
Program Tautan Kasih Bumi Kenyalang ke bisi mai sereta urung 35 nembiak universiti enggau dua iku pensyarah ngiring bala nembiak universiti nya, kelimpah ari nya madahka tuju pejalai sida iya betemu enggau bala nembiak Iban ke diau di Pasir Gudang enggau Johor Bahru betuju negutka agi kaul antara nembiak universiti enggau komuniti ke diau di genturung pendiau nya.
Dalam atur program nya mega, disengkaum pengawa pansik komuniti Iban ke dipelaba diau di genturung pendiau Pasir Gudang ke bisi lebih 3,000, pasal pemerat Jaku Iban ulih digaga nyadi seiti sabjek ke patut diajar di Pelilih Menua Pasir Gudang enggau Johor Bharu.
Sebedau nya, seiku pensyarah IPSI, Patricia Ganing madahka program nya ulih meri timbal ke manah ngagai UPSI kelebih agi bekaul enggau pemerat Jaku Iban di Pasir Gudang enggau Johor Bharu.
Kelimpah ari nya, Presiden ALUMNI UPSI pampang Sarawak, Samuel Sila Mathew Unjah, ngarapka program nya deka diteruska datai ke jemah ila, nyadi seiti program ‘baktisiswa’ ninting taun nembiak universiti ari Sarawak UPSI enggau komuniti Iban di Johor.
Maya program nya dipejadika, antara aktiviti ke bisi digaga, iya nya Mendidit Dinai, Berjawang, ajat Iban ulih nembiak universiti UPSI sereta diperindang ulih seiku penyanyi Iban ke tebilang, Rickie Andrewson Ngalai.
UPSI antara sebuah universiti ke ngemunka pelajar Jaku Iban digaga nyadi kos lalu antara nembiak keterubah ngambi kos nya bisi dalam 20 iku.
Sama bisi datai Pemangku Presiden GAIU, Mathew Usun, Presiden Gerempung Borneo Johor, Bong Chow Wie, enggau Presiden JODIA Enturan Luta.